Ukhuthaza imbokodo kwezokubhala

Comment on this story
no books INLSA UTHOBILE Msomi ongumbhali wezincwadi, osanda kwethula ethi Kochitheka Gula Linamasi. Isithombe: GUGU MQADI

LUNGI LANGA

UMBHALI osemncane ukhuthaza abesifazane ukuthi bashiye phansi uvalo ukuze kuvele amathalente abo okubhala.

UNksz Thobile Msomi (29) wasePinetown osanda kwethula incwadi yakhe yokuqala esihloko Kuyochitheka Gula Linamasi, uthe wuvalo nokusaba ukuphoxeka okuvimba ukwanda kwabesifazane abasemkhakheni wokubhala.

Uthe ubona ukuthi baningi abesifazane ababhalayo inkinga babhalela emakhosombeni imibhalo yabo igcine ingashicilelwanga ukuze ibonwe nguwonkewonke.

Incwadi yakhe ekhuluma ngothando, ukubekezela nokuxolelana, ingeyokuqala ngqa kanti isifiso sakhe ukuyibona ifundwa ezikoleni.

“Ngifune ukubhala incwadi ezoqeda isizungu iphinde inike isifundo kuloyo ozobe eyifunda,” kuchaza uNksz Msomi.

Eqhubeka echaza, uthe umbhalo oyincwadi akuwona owokukhuthaza abantu ukuthi bafunde kuphela kepha kufanele wenze umfundi acabange futhi azibuze nemibuzo ngalokhu akufundayo.

Incwadi yakhe ikhuluma ngesikhathi samanje futhi ithinta izinkinga abantu ababhekene nazo njengokubuye kugxilwe ekusabalaleni kwegciwane lengculazi nokusetshenziswa kwezidakamizwa.

Khona lapho ibuye ibuyise ithemba ngoba iveza ukubaluleka kokudlulisa izinto ezimbi umuntu aseke wabhekana nazo.

“Akwanele ukuthi thina singababhali siveze izinkinga nje kuphela kepha kufanele siqhamuke nesisombululo. Kumele sikuveze obala ukuthi zikhona izindlela abantu abangaphila ngazo impilo ephelele nengcono ngisho sebethole ukuthi banegciwane lengculazi. Akuvele ukuthi ungakwazi ukunqoba izidakamizwa,” kusho le ntokazi.

Uthe uthando lokufunda kuye kwavukuzwa ngunina onguthisha ngoba wayehlale ebathengela izincwadi.

Yize efunde ezikoleni zesilungu ezazibizwa ngama-Model C kuqala uveze ukuthi uthando lolimi lwesiZulu aluzange lusuke kuye.

Lapho abaningi bebengalindela ukuthi alobe incwadi yesiNgisi uthe ukuletha eyesiZulu yikho abezimisele ngakho kwasekuqaleni.

Ukhuthaze abazali ukuthi bangayeki ukujwayeza abantwana babo ukufunda izincwadi zesiZulu ngisho befunda ezikoleni ezixube izinhlanga.

“Kuvame kakhulu ukuthi babone engathi umuntu okhuluma isiLungu usephumelele empilweni kuthi lona okhuluma isiZulu abukwe engathi usemuva. Akufuneki lokho kuhle nje ukuthi umntwana anikwe amathuba okulwazi ulwimi lakhe,” kusho uNksz Msomi.


sign up
 
 

Comment Guidelines



  1. Please read our comment guidelines.
  2. Login and register, if you haven’ t already.
  3. Write your comment in the block below and click (Post As)
  4. Has a comment offended you? Hover your mouse over the comment and wait until a small triangle appears on the right-hand side. Click triangle () and select "Flag as inappropriate". Our moderators will take action if need be.