Gallo Images

Isikhulu esiphezulu ku-Safa uRobin Petersen

KUSEYINDINDA namanje ukuthi iqembu le-Under 23 lizobophela baphi abadlali ku-Eight Nations Tournament eMorocco ngesonto elizayo ngenxa yokuthi akukaziwa ukuthi amaqembu azodedela baphi abadlali.

Kubukeka sengathi AmaGlug-Glug azophinde abophele abadlali abahlukile kunalabo abebedlala eyobungani ne-Algeria nokuyinto esijwayelekile. u-Ephraim “Shakes” Mashaba akakaze adlale ngeqembu elifanayo imidlalo ehlukene ngenxa yakungabatholi abadlali emaqenjini ePremier Soccer League (PSL).

Umqondisi wamaqembu esizwe, u-Ace Kika, uthe abakazi ukuthi lizomenyezelwa nini iqembu eliphelele le-Under 23 elizoya eMorocco kweyokuhlungela ama-Olympics azoba seLondon ngonyaka ozayo.

Amanye amaqembu ePSL ashaye phansi ngonyawo athi ayabafuna abadlali bawo uma sekudlule izinsuku zeFifa nokuphoqe uMashaba ukuthi angabe esaqhubeka nezinhlelo zakhe. Phambilini uhlelo lweSafa lwaluthi AmaGlug-Glug ngeke esabuyela kuleli kodwa azosukela e-Algeria esebheke eMorocco.

“Kungaphezu kwamandla ethu. Ngeke sikwazi ukumemezela abadlali singakazi ukuthi sizobathola yini. Uma sesazi sizobe sesimemezela iqembu elizoya eMorocco eliphelele. Kungenzeka ukuthi uMashaba athole abadlali abasha, okungebona labo abehambe nabo eya e-Algeria,” kusho uKika.

Elakuleli liseqoqweni elilodwa ne-Egypt, Gabon ne-Ivory Coast. amaqembu amathathu azoqeda ephezulu azoya eLondon. Elesine lizodlala nelase-Asia ukubanga indawo yokugcina.

Isikhulu esiphezulu ku-Safa, uRobin Petersen (osesithombeni) uthe balwa mihla namalanga ukuze uMashaba athole bonke abadlali abadingayo.

“Sonke sifuna ukubona i-Under 23 iphumelela. Akhona amaqembu ePSL athembisa ukudedela abadlali. Sizolinda wona ukuthi adedela baphi. Simatasa senza konke okusemandleni ukuba sigcine sibatholile abadlali esibadingayo,” kusho uPetersen.

UMashaba nethimba lakhe sebevele baseMorocco. Uma ligcina lihlanganile iqembu kulindeleke ukuthi lihlangane ngoMsombuluko bese lihamba ngoLwesibili.

Lizobe selisalelwe cishe yizinsuku ezintathu ukuzilungiselela njengoba imidlalo iqala ngoMgqibelo ozayo kuze kube wuDisemba 10.

Khonamanjalo, iBafana Bafana izobhekana ne-Ethiopia kowokuhlungelwa iNdebe yoMhlaba ka-2014, okuzoqala ngo June 2 ngonyaka ozayo. IBafana ikuGroup A okukhona kuyo neBotswana, neCentral African Republic.