IPHIKWA umlando iBrazil ebholeni lezinyawo kwabesilisa kuma-Olympic Games njengoba sekuphele iminyaka engu-24 kwagcina ukuthi izwe elingosokhaya kunobhutshuzwayo lidle ubhedu.
IBrazil esizinqobe zonke izicoco ezimqoka zebhola emhlabeni jikelele ayikaze iyithole indondo yegolide kuma-Olympic Games.
Ama-Olympic Games alo nyaka adlalelwa eRio de Janeiro, eBrazil. Leli zwe elingosokhaya izinto azilihambeli kahle kwabesilisa kwazise alikaze liwine emidlalweni emibili.
Kowokuqala libambane neNingizimu Afrika ngo 0-0 kwathi kowesibili labanjwa yi-Iraq ngo 0-0. IBrazil ihlezi endaweni yesibili ngamaphuzu amabili ngemuva kwemidlalo emibili. Kowokugcina izodlala neDenmark eqhwakele kusasa ngo-3 ezintatha (ngokwesikhathi sakuleli) eFonte Nova Arena, eSalvador.
IBrazil ebophele insephe yayo uNeymar, ibhekene nenselelo yokuqeda ishobolo leminyaka. ISpain yizwe lokugcina eladla igolide emidlalweni yama-Olympic ekubeni ingosokhaya. Ngo-1992 iSpain yayisingethe ama-Olympic Games eBarcelona.
Ngo-2012 iGreat Britian yehluleka yancama ukudla umhlanganiso kuma-Olympic ayeseLondon e-England. IMexico iyona eyagcina ikhale yemuka negolide. Ngo-2008 eBeijing, eChina, nango-2004 e-Athens, eGreece, i-Argentina iyona eyagoduka negolide.
Ngo-2000, iCameroon yanqoba igolide kwabesilisa kuma-Olympic Games ayeseSydney, e-Australia, kwathi ngo-1996 lanqotshwa yiNigeria e-United States of America.
IBrazil ibhekene nomthwalo wokuqeda lolu khondolo olubi olubhekene namazwe asuke engosokhaya kuma-Olympic Games.
Emlandweni wama-Olympic Games mathathu kuphela amaqembu ake adla igolide ekubeni engosokhaya. Ngo-1908 iGreat Britain iyona eyadla umhlanganiso eLondon kwathi ngo-1920 iBelgium yadla umhlanganiso e-Antwerp.
Ama-Olympic Games aqala ngo-1896 e-Athens, eGreece.