Duif du Toit

Umshayisibhakela wakuleli uMzonke Fana ugxeka uBranco Milenkovic weBranco Sports Production ngokuhanjelwa kabi yizinto. Isithombe: Gallo Images

ZAKHELE XABA

UKHALA ezimathonsi ngowayengumgqugquzeli wezimpi zakhe uMzonke “The Rose of Khayelitsha” Fana othi usephenduke ihlaya ngisho kubantu asondelene nabo ngenxa yokuhlithwa kwakhe isicoco se-IBF engasivikelanga nokungazitholi izimpi.

UFana osephenduke undingasithebeni ekubeni engomunye wabashayisibha-kela ababeka iNingizimu Afrika ebalazweni lomhlaba usola uBranco Milenkovic weBranco Sports Production (BSP) ngokumbulalela ikusasa lakhe kulo mdlalo.

“Sengiphenduke inhlekisa abantu bakhombisana ngami. Basizakala ngami bathi ngeke ngiphinde ngibuyele esibhakeleni futhi ngeke ngiphinde ngibe ngumpetha.

“Abazidela amathambo bangibuze, ngiyabatshela ukuthi ikusasa lami libulawe uBranco nguye oyisizathu sokungalwi kwami. Kodwa konke ngikubeke kuNkulunku-lu, nguye ozongiphendu-lela,” kusho uFana obezwakala ukuthi uphatheke kabi.

UFana wephucwa ibhande le-IBF yile nhlangano ngonyaka odlule emuva kokuthi kudlule isikhathi sokulivikela engakwe-nzanga lokho nokwasa-balala ukuthi yingoba engenaye umqeqeshi owayezomsiza ukulungiselela impi.

Lo mshayisbhakela ongowokudabuka eMonti udaba walufaka ekomidini lezemidlalo ePhalamende okwathi uma kwenziwa izethulo kwavela ukuthi babebanga imali okwakufanele ayithole ngokuvikela isicoco.

IPhalamende layalela i-IBF ukuthi imbuyisele ibhande kodwa yenqaba yathi kufanele aqale phansi alwe izimpi zokuhlunga uma esafuna ukuliphatha.

Ngaphambi kokuphe-la konyaka odlule uFana nomqeqeshi uGarry Barret bashaye indesheni kumphathi weGolden Gloves Promotions uRodney Berman becela ukuthi abashayele indesheni ku-IBF ukuthi kubuye ibhande lakhe.

Kodwa le nhlangano engenye yezinkulu emhlabeni yathi kufanele athole impi yokuhlunga kuqala ukuze abuyele ohlwini lwayo.

Ngesikhathi esethe-mbile uFana ukuthi uzoyithola impi lapho ayezobhekana khona no-Irvin “Prettyboy” Buhlalu, yavele yabhuntsha ngemizuzu yoku-gcina. Le mpi wayeyihlelelwa uHerold Benn wePound 4 Pound.

Emasontweni edlule kusabalale imibiko yokuthi uFana usetholelwe enye impi ezoba seThekwini ezoba kuyo le nyanga kodwa yena uthe akazi lutho ngalokho.

“Ngizihlalele ekhaya ngiyaziqeqesha kodwa ayikho impi engiyaziyo. Ngenzela ukuthi uma kukhona okuqhamukayo ngibe ngilungile,” kusho uFana.

Ebuzwa ukuthi ngabe lokhu kusho ukubuna “kwembali yaseKhayelitsha”, udonse umoya kakhulu wathi: “Angicabangi kanjalo kodwa uNkulunkulu owaziyo. Okwenzekayo empilweni yami uyakwazi.”

Imizamo yokuthola uMilenkovic ayiphumelelanga njengoba ucingo lwakhe belungabanjwa.