INLSA

USTHEMBISO Makhatha ezothenga iDVD kaMgqumeni nathe ufuna ukuzidelisa yena ngesigameko 'sokuvuka kwabafileyo' kwalo mculi. Isithombe: BONGANI MBATHA

SIHLE MKHIZE noMINENHLE NTOMBELA

IMIBIKO engamanga ngokuvuka kukaMaskandi uKwakhe “Mgqumeni” Khumalo kuvukuze ukuthengwa komculo wakhe njengoba bebaningi abaphuthume ezitolo zomculo beyothenga umculo wakhe ikakhulukazi ama-DVD ngoba befuna ukumbona.

Izolo Isolezwe lihambele izitolo ezahlukene ezakhele iTheku ukuzitholela kabanzi ngokudayiswa komculo weBhova.

E-Disc World eThe Workshop Isolezwe lizithele phezu komlandeli wokuqina kaMgqumeni uSthembiso Makhatha.

UMakhatha uveze ukuthi emuva kwemibiko “yokuvuka” kukaMgqumeni ukhethe ukuyothenga iDVD yokugcina yakhe, iSecret ukuze azikholise futhi aziqhathanisele yena izithombe.

“Ungibona nje ngisuka oThongathi, lezi zindaba ngiyazizwa futhi nasemaphepheni ngiyazifunda njengamanje ngikhethe ukuthenga iDVD ukuze ngiziqhathanisele ngokwami. Ngisaphithene ikhanda namanje ngoba angisazi ukuthi yikhona kuphi okuyiqiniso,” kulandisa uMakhatha.

USAMUKELO Mzulwini ongumsebenzi waKwaJet Music ekhombisa ngeDVD kaMgqumeni athi iyona edayise ubuthaphuthaphu selokhu kuphume imibiko 'yokufa avuke'. isithombe: BONGANI MBATHA

INLSA

Umdayisi wakulesi sitolo uBrady Naidoo uthe basalelwe ngama-CD amane nje kuphela kaMgqumeni kusukela ekusabalaleni kwamahlebezi okuvuka kwalo mculi.

“Uma uqhathanisa nangesikhathi eshona ngo-2009 amaCD athengwa ubuthaphuthaphu kodwa kwaphinda kwehla. Muva nje asedayiswa okwamagwinya ashisayo. Kuhamba kakhulu icwecwe lakhe lokugcina iSecret sesicabanga ukulanda esinye isitokwe,” kusho uNaidoo.

KwaJet Music kuPine Street kulo leli dolobha uVusi Hadebe ongumdayisi uthi kuthengwa kakhulu iDVD i-Autograph kanti iCD esihloko sithi Secret ayisekho emashalofini.

“Abantu abaningi kulesi sitolo bathenga kakhulu iDVD i-Autograph kanti iCD yakhe agcine ukuyikhipha iSecret asisenayo emashalofini,” kusho uHadebe. E-Musica khona balandulile abasebenzi bakhona bethi abakaze babe nawo amaCD noma amaDVD alo mculi bakuveza ukuthi bakhona abantu abafika bezobuza.