MBONGISENI BUTHELEZI
EseGoli
U ZOKWANELISEKA kuphela uma enganqoba indebe yeNedbank Cup umqeqeshi we-Orlando Pirates u-Eric Tinkler.
Iqembu likaTinkler lizophinda lidlale neSupersport United kulokhu kowamanqamu eNedbank Cup ozodlalwa ePeter Mokaba Stadium, ePolokwane ngoMgqibelo ngo-3 ntambama.
La maqembu asonge isizini ye-Absa Premiership ebambana ngo 2-2 ngempelasonto e-Orlando Stadium ngoMgqibelo ntambama. Amagoli ashaywe uBradley Grobler noDenwin Farmer we-United, awePirates ahlohlwa uSifiso Myeni noMpho Makola.
UTinkler ubeze kulo mdlalo ezoqiniseka ukuthi iqembu lakhe liyayithola indawo kuTop 8, okwenzekile liqeda endaweni yesikhombisa ngamaphuzu angu-41.
Isimo sikaTinkler sicishe sifane nesomqeqeshi weManchester United, uLouis Van Gaal, obenengcindezi yokufaka iqembu kuTop 4 bese edla ubhedu kuFA Cup efana neNedbank e-England.
UVan Gaal ugcine ephumelele ukudla i-FA Cup kwazise ama-Red Devils aqede endaweni yesihlanu ku-log ye-English Premiership okusho ukuthi azodlala ku-Europa League ngesizini ezayo. Lo mphumela usho ukuthi lo mqeqeshi waseHolland usenayo into angakhulumela phezu kwayo uma efuna ukugcina umsebenzi wakhe nangesizini ezayo. NakuTinkler ukunqoba iNedbank Cup kungayihlobisa i-CV yakhe kusihlalo weZimnyama, u-Irvin Khoza futhi iqembu lizobuyela kuCaf Confederation Cup ngonyaka ozayo.
Ukudlala ngokulingana kwePirates neSuperSport, bobabili kubafake kuMTN 8 yangesizini ezayo.
“Ukube benginqobe umdlalo wamanqamu eConfederation Cup esahlulwa kuwona kowamanqamu noma iTelkom Knockout esakhishwa kuyo kuma-semi final bese siqeda endaweni ephezulu ku-log, bengizothi nganelesekile ngoba bekuzobe kukhona esikuphethe esandleni. “Kodwa manje akunjalo. Kufanele sinqobe indebe yeNedbank esiyidlala ngempelasonto ukulungisa isimo emva kwalokho ngizothi ngenelisekile. Sisethubeni elihle lokuthi sinqobe le ndebe siqede isizini kahle,” kusho uTinkler.
Uthe bekusemqoka ukungahlulwa yi-United.
“Besingazimisele ukungenelwa ngamagoli. Siphoxwe indlela ebesivimba ngayo emuva, sibayekile. Bekufanele siwunqobe lo mdlalo. Okubi ukuthi bashaye amagoli ngezinto ebesizilungiselele ngazo (amakhona nama-free kick). Maphakathi nesonto sizophinda sisebenze ukuyilungisa indlela esiwavimba ngayo ngaphambi komdlalo wamanqamu,” kusho uTinkler osabheke ukunqoba isicoco sakhe sokuqala njengomqeqeshi. Uthe bazothatha okuhle abakwenzile kulo mdlalo wehlandla lokuqala ne-United basebenzele phezu kwakho ukwenza amalungiselelo omdlalo wamanqamu. “Sizamile ukuthi sishintshe indlela esidlala ngayo, kubukeka kusisebenzele koweligi besidlala i-3-5-2 .”