Uzobuyisa isithunzi nodumo uHitman?

Lefty Shivambu / Gallo Images

KUBHEKWE ukuthi abuyise isithunzi sakhe uCassius Hitman Baloyi njengoba ezobhekana noPaulos Hitman Moses waseNamibia, empini yesicoco esisha se-World Boxing Organisation (WBO) International eRamatex Factory, eWindhoek, ngoMgqibelo.

ZAKHELE XABA

OWAYENGUMPETHA womhlaba uCassius “Hitman” Baloyi uthi usekulungele ukulungisa amaphutha amenze waphenduka ukudla kwenduku ezinyangeni ezedlule.

UBaloyi uzothola ithuba lokubuyisa isithunzi njengoba ezobhekana nomakadebona waseNamibia, uPaulos Moses, owayeyingqwele kuWBA Light Heavyweight, empini yesicoco esisha se-World Boxing Organisation (WBO) International eRamatex Factory, eWindhoek, ngoMgqibelo.

Le mpi ihlelwe yiSunshine Boxing Promotions ephethwe nguNestor Tobias waseNamibia ngokubambisana noDingaan “The Rose of Soweto” Thobela wakuleli owayengumpetha womhlaba.

Ngaphandle kokuthi uBaloyi osewake waphatha amabhande e-IBF, IBO, WBU ujabulela ukuthola ithuba lokugeza igama lakhe, uthi uzokhombisa abantu ukuthi ufundile emaphutheni awenzile naholele ekutheni angqinyuzwe kathathu ezimpini ezine azilwile.

Ugcine ukwehlulwa ngoJanuwari 2011 ekhala ngaphansi ngamaphuzu ku-Argenis Mendez waseMexico empini yokuhlungela isicoco se-IBF Super Featherweight empini eyayiseCarnival City, eGoli. Ngaphambi kwalokho wayehlulwe nguMzonke “The Rose of Khayelitsha” Fana bebanga yona i-IBF.

“Ngiwabonile amaphutha angenze ngehlulwa kulezi zimpi ezedlule futhi sengikulungele ukubuyela eringini ngiqhubeke nomkhankaso wami wokunqoba isicoco seWBO enginesikhathi ngisifuna,” kusho uBaloyi ongomunye wabashayisibhakela abahlonishwayo kuleli.

Emuva kokwehlulwa kulandelana, uBaloyi wagxekwa kakhulu, abanye belimisa ngesihloko elokuthi sekufanele abeke amagilavu ethala ngoba usephelelwe yisikhathi. Nangempela uvele wanyamalala esibhakeleni, wagxila ekuqeqesheni ama-amesha e-Alexandra, eGoli.

“Anginendaba nabantu abakhuluma abakuthandayo. Ngiyakwazi engakwenza okwenza ngingaphumeleli. Okungihlalele manje ukungena eringini ngibuye nesicoco engazi kahle ukuthi ukusinqoba kuzongivulela amathuba amaningi. Ngizobavala imilomo bonke abakhuluma abakuthandayo ngami,” kusho uBaloyi.

UBaloyi ufulathele elakuleli izolo ehambisana no-Isaac “ The Angel” Hlatshwayo oyolwa noBethel Ushona empini yesicoco seWBO Africa . U-Ushona usanda kukhala ngaphansi nguJan Zaveck waseSlovenia bebanga ibhande leWBO Inter-continental ngasekuqaleni konyaka. Naye uHlatshwayo njengoBaloyi, usehlulwe izimpi ezintathu kwezine zokugcina azilwile. Akubuzwa-ke ukuthi naye ufuna ukubuyisa isithunzi sakhe emdlalweni wamankomane. Ugcine ukungena eringini ehlulwa nguBongo Lipembo ngoMashi.

Umqeqeshi wabo uKeith Raas wakubeka akangahloniza ukuthi uhlose ukubabuyisela esicongweni oBaloyi noHlatshwayo.