Uzoshintsha indlela ebukwa ngayo i-Afrika

Comment on this story
no Komla Dumor2 . UKomla Dumor unethemba lokuthi uhlelo azolwethula ku-BBC News ngoJuni 18, iFocus On Africa, luzoshintsha indlela umhlaba obuka ngayo leli lizwekazi. Isithombe: SITHUNYELWE

BONISWA MOHALE

KULINDELEKE ukuthi lushintshe indlela amazwe aphesheya kwezilwandle alibuka ngayo izwekazi i-Afrika uhlelo olusha lwezindaba olubizwa nge-Focus On Africa.

Lolu hlelo oluzokwethulwa yinkunzi eluvava ebuntathelini yaseGhana, uKomla Dumor, luzoqala ngoMsombuluko Juni 18 ku-BBC News (Channel 400 ku-DStv). luzodlala ngo-7.30 ebusuku.

Ngokusho kukaDumor obese-Oyster Box Hotel, eMhlanga, eThekwini, ukuzokhuluma nezintatheli ngalolu hlelo, luzohluka kakhulu kwezinye ngoba luzobe luxoxa ngezindaba zase-Afrika futhi lwethulwa ngabantu base-Afrika.

Uthe ngeke izindaba zibheke kuphela udlame olwenzeka emazweni ehlukene aleli zwekazi i-Afrika kodwa zizobheka nokuhle okwenzekayo kwezomnotho, ezokungcebeleka nakweminye imikhakha.

“Sinezintatheli cishe kuwo wonke amazwe ase-Afrika kanti naseNingizimu Afrika zikhona izintatheli zethu okubalwa phakathi kwazo oNomsa Maseko noMilton Nkosi abazobe besicoshela konke okwenzekayo. Inhloso yethu wukuthola izindaba ezikhombisa ukuthi i-Afrika ayinalo udlame kuphela kodwa iyizwekazi elithuthukayo nakwezomnotho,” kusho uDumor.

Uthe useke wabhala nangohlelo lososayensi lwe-Square Kilometre Array (SKA) ebuza ukuthi ososayensi baseNingizimu Africa bazosizakala kanjani ngokuba khona kwayo kuleli zwe.

UDumor ubuye waveza ukuthi ukukhonjiswa kwezimpi ezenzeka emazweni ehlukene ase-Afrika akusho ukuthi iziteshi azilithandi leli zwekazi kodwa kuvezwa lezi zimpi ukuze umhlaba wazi ngazo.

“Uma singakhulumi ngezimpi ezenzeka emazweni ethu umhlaba ungeke wazi ngazo. siyaziveza ukuze kutholwe isixazululo. I-Focus On Africa izobukwa ngabantu abangu-77 million e-Afrika,” kusho uDumor.

UDumor wangena ebuntathelini ngo-1998 kanti usebenzele i-BBC kusukela ngo-2007 kuze kube manje.

Uqanjwe ngosuku lwesonto njengabanye abantu baseGhana kanti igama lakhe elithi Komla lisho uLwesibili ngolimi lwakuleliya lizwe.

Kulabo abangenayo i-DStv kulindeleke ukuthi balubone lolu hlelo ngokuhamba kwesikhathi ngoba abe-BBC bazoxoxisana neziteshi ezahlukene, ngokusho kukaMnuz Stephen Martin obhekelele ezokwakha ubuhlobo kwa-BBC.


sign up
 
 

Comment Guidelines



  1. Please read our comment guidelines.
  2. Login and register, if you haven’ t already.
  3. Write your comment in the block below and click (Post As)
  4. Has a comment offended you? Hover your mouse over the comment and wait until a small triangle appears on the right-hand side. Click triangle () and select "Flag as inappropriate". Our moderators will take action if need be.

  5. Verified email addresses: All users on Independent Media news sites are now required to have a verified email address before being allowed to comment on articles. You are only required to verify your email address once to have full access to commenting on articles. For more information please read our comment guidelines