Wandulelwa yimfashini oweVodacom

.

BATHI ubumnandi be-Vodacom Durban July buzoqala eGateway oNksz Prinella Pillay obhekelele ezokuxhumana nokukhangisa kule nxanxathela yezitolo lapha uthathwe nomsiki wengqephu u-Andre Martin. Isithombe: BUHLE MBONAMBI

BONISWA MOHALE

BUZOQALA enxanxatheleni yezitolo iGateway ubumnandi obandulela umjaho iVodacom Durban July, ngemuva kwesimemezelo sokuthi le nxanxathela izosingatha umbukiso wemfashini ngoJulayi 6, okuwusuku olwandulela umjaho.

Lokhu kucace izolo ngesikhathi kwethulwa ngokusemthethweni imicimbi yeVodacom Durban July eGateway Hotel, eMhlanga.

Umbukiso wemfashini uzobe ugabe ngabasiki bengqephu abahamba phambili kuleli okubalwa kubo o-Kathrin Kidger, Andre Martin nabanye.

Ngalo lolu suku kuzobuye kube nesiphihli sephathi okuzobe kuboshelwe kuso o-DJ besiteshi somsakazo i-5 FM oFresh no-Euphonik, iqembu lomculo iLiquideep neNisekerone.

Le phathi izobe ise-Wavehouse kusukela ngo-6 ebusuku kuze kuse.

IMISIKO efana nalena egqokwe ngumkhangisi wengqephu kulindeleke ukuthi igqame kwi-Vodacom Durban July yalo nyaka njengoba abasiki bengqephu abaningi besebenzisa indwangu esasaka. Isithombe: SHERELEE CLARKE

Ex-QDMS

UFresh nethimba lakhe bazobe besakaza bukhoma kule nxanxathela yezitolo kusukela ngesonto elizayo.

Ngokusho kukaNksz Prinella Pillay obhekelele ezokuxhumana nokukhangiswa eGateway, akukhona lokhu kuphela okuzobe kubikezela ukuqala kweVodacom Durban July njengoba benemincintiswano eyahlukahlukene.

Uthe okudingeka ukwenze wukuthi ungene ekhasini labo le-Facebook bese uthola iminingwane egcwele.

Uye waveza ukuthi kule mincintiswano abantu bangawina amathikithi okubukela i-Vodacom Durban July nawokuyobuka isihlabani somculo u-Madonna kwenye yamakhonsathi akhe ka-2012.

Ube esekhumbuza abantu ukuthi indikimba yalo nyaka ithi A Material World okusho ukuthi kucelwa abantu ukuba banakekele imvelo.

“Kulo nyaka kuzobe kungunyaka wesine senza umbukiso wemfashini ngakho-ke abasiki bengqephu batsheliwe ukuthi indikimba ithini nabo base besebenzisa ucwazi, amaphepha, amasaka nokunye okuningi. Sisebenzisana noMasipala weTheku nabasiki bengqephu abasathuthuka. Laba basiki bengqephu bayingxenye yomcintiswano esiwenzayo,” kuchaza uNksz Pillay.

Uthe umsiki wengqephu ozowina uzohamba ne-gift card ka-R20 000 nokheshi ka-R10 000.

Kuzobuye kube nemincintiswano ezokwenziwa ohlelweni lukaFresh olubizwa nge-Fresh Drive lokukhangisa imicimbi ye-Vodacom July eseGateway.

Okuzothokozelwa ngabalandeli baka-DJ Fresh wukuthi uzobe enza enye i-tatoo khona eGateway kanti abantu bazothola ithuba lokumbuka bukhoma enza lokhu.