NONTUTHUKO NGUBANE
K UPHUME izidumbu ezimbili eNanda umphakathi ugandaya ngamatshe ababili abasolwa ngokweba amakhebuli kagesi okuthiwa kudla lubi kuleya ndawo.
NgoLwesibili amaphoyisa abizwe ukuzolanda isidumbu soyedwa ngemuva kokushaywa wumphakathi. NangoLwesithathu kwabanjwa omunye naye owashaywa waze wafa.
Isolezwe lithole ukuthi laba ababili babanjwe umphakathi ngezinsuku ezilandelanayo bephethe amakhebuli kagesi okusolwa ukuthi bawanqamule ezigxobeni zikagesi.
Izindawo eziningi ezakhelene neNanda okubalwa iNtuzuma, KwaMashu, Mount Royal zibhekene nengwadla yokwebelwa amakhebuli.
Isolezwe lihoshe umoya wokuthi kungenzeka ukuthi sekungenelele abanye osomabhizinisi ekuntshontshweni kwamakhebuli ukuze bahlomule ngamathenda.
Imigwaqo eminingi kuthiwa ayisakhanyi njengoba kuthiwa kunabantu abafika basike kwasani, kuthi kusa akusakhanyi.
Isolezwe lithole ukuthi inqwaba yamacala asevuliwe okuntshontshwa kwamakhebuli.
Okhulumela amaphoyisa KwaZulu-Natal u-Lieutenant Nqobile Gwala ukuqinisekisile ukuthi kubulewe ababili eNanda.
“NgoLwesithathu ngo-3 ekuseni sithole isidumbu sowesilisa eMatikwe silinyaziwe ekhanda nasesifubeni. Kube sekuvulwa icala lokubulala esiteshini saseNanda. NgoLwesibili ngawo u-3 ekuseni sithole omunye wesilisa oneminyaka engu-36 elinyazwe kanzima ekhanda nasemzimbeni eNgcugcwini, eNanda. Icala lokubulala livuliwe. Imbangela yokuhlaselwa kwalaba bobabili ayaziwa, uphenyo lwamaphoyisa lusaqhubeka,” kusho uGwala.
Umthombo we Solezwe uveze ukuthi sekunesikhashana lesi sihlava siqhubeka nokwenze umphakathi ukhethe ukuzilungisela.
“Umphakathi waseNanda ubusukhathele abantu abantshontsha amakhebuli njengoba beshaywe ngamatshe baze bashona abasolwa. Bese kuhlalwa ngobumnyama ngenxa yokuntshontshwa kwamakhebuli kagesi,” kusho umthombo.
Isolezwe lithole ukuthi abasolwa bebegqoka amaphinifa uma sebezokweba amakhebuli. Kuthiwa bebewalayisha emotweni.
Omunye umthombo wase-Mount Royal uveze ukuthi abasolwa bafika baqhumise nezibhamu uma bezothatha amakhebuli, ukuze kungaphumi muntu umphakathi ube nokwesaba.
Kuthintwa uMasipala weTheku ngezikhalo zokuntshontshwa kwamakhebuli okuxakile, ophethe ezokuxhumana uNksz Tozi Mthethwa uthe: “Umasipala uthola izikhalo eziningi ngokwebiwa kwamakhebuli kagesi. Ukuntshontshwa kwamakhebuli kuholela ekushoneni kwabantu nokulahleka kwengqalasizinda.
“Umasipala ngonyaka ugcina usebenzisa imali engu-R230 million. Okubuhlungu isikhathi esiningi amakhebuli avulekile agcina esebulala izingane ezincane ezisuke zidlala.”
Abanenkinga nogesi bathinte
ku: 080 13 13 111,sms: 083 700 0819.