Sapa
K UNOBUFAKAZI obenele ezinkulumeni eziqoshiwe zezobunhloli ukuthi singabuyekezwa isinqumo sokuhoxiswa kwamacala enkohlakalo ayebhekene noMengameli Jacob Zuma, umholi weDA uNkk Helen Zille usho kanjalo izolo.
“Sengiyifundile imibhalo esuselwe kulezi zinkulumo ezaqoshwa esizinikwe yiNPA (National Prosecuting Authority) ngoLwesine olwedlule. Zihlanganisa izinkulumo eziqoshiwe ezingu-36 ezinyangeni ezinhlanu,” kusho uZille kwi-newsletter i- Democratic Alliance SA Today.
“Ngaphandle kokuveza okuqukethwe, ngigculisekile ukuthi “lezi zinkulumo eziqoshiwe’’ zingasinika ubufakazi obenele ukuqhubeka nesicelo sethu sokuthi kubuyekezwe isinqumo esenziwa nguMqondisi owayebambile wezokuShushiswa koMphakathi uMokotedi Mpshe, sokuhoxisa amacala ayebhekene noMengameli Jacob Zuma.’’
Abameli beDA baxwayise le nhlangano ukuthi ingalinge ivezele umphakathi okuqukethwe “yilezi zinkulumo eziqoshiwe zezobunhloli’’.
Isizathu salokhu yisinqumo senkantolo saphambilini esesisebenza njengesibonelo seJaji u-Ashley Binns-Ward eNkantolo eNkulu eWestern Cape ecaleni ebeliphakathi kukaMasipala waseKapa neSouth African National Roads Agency Limited (Sanral).
Icala elibandakanya iSanral beliphinde libe mayelana nesicelo sokubuyekeza isinqumo seDA, odabeni lwesinqumo seSanral ukwakha umgwaqo omkhulu uN1/N2.
UBinns-Ward uthole ukuthi kunomthetho ovimbela ukuthi amaphepha athile asenkantolo anikwe abathintekayo ecaleni ngaphambi kokuthi isicelo silalelwe enkantolo.
Usihlalo kuDA uMnuz James Selfe uthe phambilini iDA ibihlose ukuvezela umphakathi okuqukethwe kulezi zinkulumo eziqoshiwe.