KUZOTHELEKA abapheki abadumile bakuleli nabaphesheya kwezilwandle embukisweni wokudla iGood Food & Wine Show, ozoba se-Exhibition Centre, eThekwini ngo-Okthoba 24 uphele ngomhlaka-26.
Intokakazi yase-East London uSiba Mtongana owaqala ukuzakhela igama ngesikhathi esengumhleli wekhasi lokupheka ephephabhukwini i Drum, waphinde waba nohlelo i Cooking With Siba oludlala kuMzansi Magic nokuyimanje ongomunye wamajaji ohlelweni i Chopped South Africa, uzoba yingxenye yabapheki abaqavile abazoba kulo mcimbi.
Le ntokazi yaba wumuntu omnyama wokuqala kuleli ukuba nohlelo lokupheka olwasakazwa emazweni angu-90, e-Europe, Middle East nase-Afrika.
Kulo mcimbi uzobe ehambisana nabanye abapheki baphesheya kwezilwandle okukhona kubo uHyden Quinn owethula uhlelo i Hyden Quinn South Africa, uSanjeev Kapoor wase-India, Mauro Castano waseMelika osezakhele igama ohlelweni lokubhaka i Cake Boss noReza Mahammad naye osezakhele igama ngokuhambela amazwe ahlukene e-Afrika efunda ngendlela okuphekwa ngayo.
USiba okuyimanje ulungiselela ukuthola umntwana wesibili, uzotheleka kulo mcimbi ukuzoxoxa ngakuzuzile selokhu aqala ukusebenza ngokudla.
“Ugqozi lokuthi ngithande ukupheka nokudlala ngokudla lusuka kudala sisakhula ekhaya njengoba sasidla ukudla kwalapho ngangizalwa khona kwaqhubeka ngokuhambela izindawo ezahlukene nakhona ngidla ukudla okuhlukile nokuthe sengimdala ngahlangana nabantu basemazweni ase-Afrika nakhona ngezwa okunye ukudla lokhu okwangenza ngafuna ukwazi okuningi okuphathelene nezinto esizidlayo,” kusho uSiba.
Uthe usebenze kanzima ukuthi afike kulesi sigaba akuso manje nabonga kakhulu uMdali ngempilo ayiphilile.
“Ngingumuntu ohlala elangazele ukuphumelela futhi ngihlala ngisebenza kanzima ukuze ngingazitholi senginesithukuthezi, yingakho ngifuna kuhlala ngenza into ezongenza ngihlale ngitatazela ukupheka nokwaba yikho engakubona kungifanele,” kuchaza uSiba oneziqu zeFood and Consumer Science azithola eNyuvesi yaseKapa.
Abafuna ukuba yingxenye yalo mcimbi amathikithi ayathokalala eComputicket nasemnyango-R80 abadaka kuthi awezingane abize u-R40.