ZAKHELE XABA
Bloemfontein Celtic (0) 1 Kaizer Chiefs (0) 0
B ADLALE ngethuba lokuzifaka esikimini abadlali beKaizer Chiefs abalizwa ngendaba ijezi ngesikhathi behlulwa yiBloemfontein Celtic emdlalweni weSparta Macufe Cup eFree State Stadium, eBloemfontein, izolo ntambama.
Phezu kokuba iMacufe ithathwa njengomdlalo wobungani, wokusonga iMacufe Festival kodwa abadlali beChiefs abanikwe ithuba bebenengcindezi yokuzibonakalisa ethimbeni labaqeqeshi. Igoli eliwinise iCeltic iMacufe okwesine kulandelana, lishaywe nguTshegofatso Mabaso esiwombeni sesibili.
Kubadlali abathole ithuba kuMacufe kukhona uMorgan Gould obengukaputeni wosuku ongakaze adlale kusukela kufike uSteve Komphela ePhefeni, Brilliant Khuzwayo, Ovidy Karuru, Lucky “Sheriff” Baloyi, Hendrick Eikstein, Sula Matovu, Siyanda Xulu osephenduke ukudla kwebhentshi, Bongani “Drogba” Ndulula nabanye.
KuChiefs izintambo zokuqeqesha bezibanjiswe uDoctor Khumalo oyiphini likaKomphela esizana nenkakha u-Arthur “10111” Zwane. ICeltic ibizidedele kuLehlohonolo Seema owayengukaputeni wayo eminyakeni edlule, oseyiphini lomqeqeshi uClinton Larsen. Ubesizwa nguDitheko Mototo owake wadlala nakuChiefs.
Emdlalweni wayizolo iCeltic iyona eqale yakhombisa ukuzinza, yakha amathuba okushaya igoli kodwa iChiefs yasheshe yavuka emaqandeni yawulawula umdlalo. Imbumbulu yeshodi likaGeorge Maluleka iphelele ezandleni zikanozinti u-Ayanda Mtshali. Kusuka lapho iChiefs ibikade isiphungwa ngezithebe kodwa ihluleka ukusebenzisa amathuba. Abadlali beCeltic abafana noDumisani “Du” Zuma noVuyani Ntanga bebeyiphela endlebeni odongeni lweChiefs. Sekusele imizuzu embalwa kuyiwe ekhefini, uMabaso uhluleke wukuvalela phakathi ibhola ebeligotshwe nguTumelo Mogapi ngakwesokunxele nebelingashintsha izinto.
Esiwombeni sesibili, womabili amaqembu abuye esengeze umfutho kodwa besingakalapheki isifo sokuhlulwa ngamathuba. Nokho ngomzuzu ka-62 uMabaso ugqashuke kubadlali basemuva beChiefs, walivalela phakathi emuva kwebhola elide ebelishaywe ngozakwabo emuva besusa umhlola ekhaya.
Amakhosi agcina ukuwina iMacufe ngo-2011. Kwemithathu eyedlule iCeltic ibizitamuzela kulo mqhudelwano oqalwe ngo-2004. IChiefs ineMpumalanga Black Aces kowe-Absa Premiership eFNB Stadium, eSoweto, ngo-8 ebusuku.