MINENHLE MKHIZE noMTHOKOZISI MNCUSENI
U MGADLI weKaizer Chiefs uMatthew Rusike akaziboni enengcindezi yokwenza imilingo egilwe abadlali baseZimbabwe abebegijima kuMakhosi eminyakeni eyedlule.
Kusihlwa ngo-7.30, e-FNB Stadium, iChiefs izodudulana ne-Ajax Cape Town emdlalweni we-Absa Premiership. Ngemuva kwalo mdlalo Amakhosi azodudulana ne-Orlando Pirates ngoMgqibelo ngo-3.30 ntambama eFNB.
URusike uyazitamuzela ngesikimu kuChiefs kusukela kuhambe umkhaya wakhe uKingston Nkhatha obeyithemba lomqeqeshi weZimpofana uStuart Baxter.
IChiefs yaziwa ngokulanda ukhilimu wabadlali abadabuka eZimbabwe. Kubadlali baseZimbabwe asebeke bagqoka imibala yeChiefs ngempumelelo kukhona noKnowledge Musona ongalibheki ipali.
Ngo-2010/2011 uMusona wagila izimanga kuPremier Soccer League (PSL) eqobela enethini amagoli angu-15 emidlalweni engu-29 yeligi okwenza wakhala wemuka nomklomelo womdlali oshaye amagoli amaningi.
Ngesizini edlule uMusona ubebolekiswe kuChiefs yiTSG Hoffenhiem yaseGermany abegijima kuyona. Kuleli qembu ufike wahlabana ngomklomelo womdlali oshaye amagoli amaningi ngangu-15 kuyo yonke imiqhudelwano.
“Anginayo ingcindezi yokulandela ezinyathelweni zikaNkhatha, Musona noma uNengomasha (Tinashe). Mina ngingomunye umdlali ohlukile kunabo ngoba izindlela zethu zokudlala azifani. Inselelo enginayo eyokuzakhela elami igama kuChiefs hhayi ukuthi ngizifakele ingcindezi yokuthi ngifuna ukulandela abakhaya bami abagila izimanga kuChiefs ngezikhathi zabo. UNkhatha ubengumdlali obalulekile eqenjini kodwa ukuhamba kwakhe akusho ukuthi iChiefs isiphelile. UNkhatha akayona iChiefs,” kusho uRusike.
UNengomasha, owayeyibamba enkabeni yenkundla kuMakhosi, udlale iminyaka engu-10 kuChiefs. Ngo-2003/2004 waqokwa njengomdlali ovelele kuPSL ngemuva kokusiza iChiefs ukuthi ikhale yemuke nesicoco seligi.
“Into eza phambili kimina yiqembu. Ukuthi ngubani odlalayo noma ngubani oshaya amagoli yinto engangikhathazi. Okuhle wukuthi bonke abadlali bayawashaya amagoli,” kusho uRusike.
“Indaba yomdlalo wabakhaya yinto engekho emiqondweni yethu ngoba amaphuzu esizowalwela kuPirates ngoMgqibelo amaphuzu afana nesizowadlalela uma sesibhekene ne-Ajax kusasa (namuhla). Kufanele siyinikeze inhlonipho eyifanele ngoba iyiqembu eliyingozi. Nathi sifuna ukufika kuwona umdlalo wabakhaya sigcwele ukuzethemba. Asifuni ukufika kowabakhaya imimoya iphansi,” kusho uRusike.
Lo mdlali ukhuluma kanjena nje, omunye wabagadli abanikwe ithuba nguRoger de Sa, u-Erwin Isaacs uthe ubona ithuba elikahle lokuthi baphoxe iChiefs.
“Asikho isikhathi esingcono sokudlala nabo njengalesi. Babukeka sengathi bayasindelwa njengoba bengakanqobi kulo nyaka kweyeligi. Uma siliyeka leli thuba ngeke siphinde silithole elinye,” usho kanje lo mdlali othi ukuba kuya ngaye ngabe ngeke aphinde adlalele iqembu laseGoli ngoba leli dolobha liyamphika.
Imidlalo ye-Absa Premiership:
Namuhla: Kaizer Chiefs vs Ajax Cape Town (FNB Stadium, 7.30pm); Free State Stars vs Orlando Pirates (Charles Mopeli Stadium, 7.30pm); Chippa United vs Polokwane City (Nelson Mandela Bay Stadium, 7.30pm).
NgoLwesihlanu: Bidvest Wits v Bloemfontein Celtic (Bidvest Stadium, 8pm)
NgoMgqibelo: Kaizer Chiefs v Orlando Pirates (FNB Stadium, 3.30pm), SuperSport United v Ajax Cape Town (Peter Mokaba Stadium, 6pm), Free State Stars v Mamelodi Sundowns (Charles Mopeli Stadium, 8.15pm), Black Aces v AmaZulu (Mbombela Stadium, 8.15pm)
NgeSonto: University of Pretoria v Maritzburg United (Tuks Stadium, 3.30pm), Platinum Stars v Moroka Swallows (Royal Bafokeng Stadium, 3.30pm)