ZODWA NDABA
U KUNQOBA izindondo ezimbili kwabasubathi beLong Jump ngoLwesithathu ebusuku kuphonsele inselelo uKhotso Mokoena (osesithombeni) yokuthi azibonakalise kuTriple Jump ezoba ngo-9 kusihlwa.
UMokoena ushiye phansi iLong Jump waqoka ukwenza iTriple Jump ngoba enephupho lokuthi athole indondo kuyo.
UZarck Visser (8.12) uthole indondo yesiliva kuLong Jump elandela uGregory Rutherford (8.20) wase-England, kwathi uRushwahl Samaai (8.08) wathola indondo yethusi. Bobabili laba basubathi baye kowamanqamu emakhulu amathuba okuthi babuye nendondo njengoba beshaye into ecokeme kuma-semi final.
UMokoena ayaziwa amagalelo akhe kuLong Jump nakuTriple Jump njengoba ethole indondo yesiliva kuTriple Jump kuma-Commonwealth Games eMelbourne, ngo-2006. Waphinde wathola indondo yesiliva kuma-Olympics ayeseBeijing ngo-2008.
Kuma-Olympics ayeseLondon ngo-2012, uMokoena wahluleka ukufinyelela ezingeni elalilindelwe kuye njengoba wagcina engayitholanga indondo.
Iqembu labesifazane le-hockey lizibekisele indawo kuma-semi final lishaya i-India ngo 3-2 ngoLwesithathu nokwenze laqeda endaweni yesibili eqoqweni labo.
INingizimu Afrika izodlala ne-Australia kowe-semi final namuhla ngo-10 ekuseni. UThulani Mbenge (Welterweight 68kg) nguyena kuphela umshayisibhakela ozobuya nendondo njengoba edlulele kuma-semi final. UMbenge uzolwa noScott Fitzgerald wase-England ngo-8 kusihlwa.
UMpho Madi uzifake emlandweni eba owesifazane wokuqala eNingizimu Afrika ukuthola indondo ku-wrestling. UMade uthole indondo yethusi ku-53 kg freestyle crowd eshaya uShannon Hawke waseScotland.
UWayde van Niekerk (400m) uthole indondo yesiliva eqopha u-44.68 elandela uKirani James waseGrenanda. Isethenjwa se-javelin uSunette Viljoen esanqoba igolide eMelbourne naseDelhi siphinde sathola indondo yesiliva. INingizimu Afrika isiqoqe izindondo ezingu-32 ezingu-10 zegolide, nezingu-10 zesiliva nezethusi ezingu-12.