MINENHLE MKHIZE
I SITOBHA seKaizer Chiefs uTefu Mashamaite singase siqede umkhokha wokushaywa ngesithende kwabadlali abayibamba emuva nabahlabana ngesicoco sePremier Soccer League (PSL) emklomelweni wePSL Player of the Season.
Emlandweni wePSL kusenzeke kabili kuphela ukuthi umdlali wasemuva aqokwe njengomdlali ovelele eNingizimu Afrika. Ngo-2002/2003, uMbulelo “Old John” Mabizela waba ngumdlali wokuqala wasemuva ukuhlabana ngomklomelo womdlali ovelele kuPSL ngesikhathi i-Orlando Pirates imuka nesicoco seligi.
ULucas Thwala naye owayedlala emuva kweZimnyama uhlomule ngalo mklomelo ngo-2008/2009. UMorgan Gould naye useke waba yiFootballer of the Season ngo-2009/2010. Ngemuva kwalokho abadlali basesiswini nabagadli abaqhubekile nokuzitamuzela lo mklomelo. Ngo-2011/2012, iningi lakhala kuqokwa uSiyabonga “Bhele” Nomvete njengePlayer of the Season. Abathandi bebhola eMzansi babekholwa wukuthi uSiyabonga “Nsimbi” Sangweni wawumfanele lo mklomelo ngemuva kokusiza iBucs ukuthi ivikele ngempumelelo isicoco sayo seligi.
Kule sizini ka-2014/2015 uMashamaite useqokwe kaningi njengomdlali wenyanga. NgoSepthemba/Okthoba, uMashamaite uqokwe njengomdlali ovelele njengoba ephinde wawuphinda lo mklomelo ngo-Okthoba/Novemba.
NgoSepthemba ngesikhathi iChiefs idla isicoco seMTN 8 iqumba phansi iPirates eMoses Mabhida Stadium, eThekwini, uMashamaite owashayela Amakhosi igoli lokuwina.
Lokhu akubuzwa ukuthi kuzomnyusela amaphuzu uma sekuqokwa umdlali ovelele ekupheleni kwesizini. IChiefs agijima kuyona isadedele amagoli amancane kunawo wonke amaqembu.
Ngesizini edlule uSibusiso “Villa” Vilakazi weBidvest Wits neBafana Bafana nguyena oqokwe njengomdlali ovelele kuPSL. Ubebanga lo mklomelo nokaputeni weMamelodi Sundowns u-Alje Schut onqobe isicoco seligi noWillard Katsande weChiefs oqede endaweni yesibili.
UDaine Klate osanda kubuyela kuSuperSport United nguyena mdlali ogcine ukuphakamisa isicoco seligi bese eqokwa njengomdlali ovelele. UKlate ukwenze lokhu ngo-2009/2010 esadlala kuSuperSport asebuyele kuyona.
IChiefs edlalelwa nguMashamaite iyona ehlezi esicongweni ku-log yePremiership.
Uma iChiefs ingagcina isiwinile isicoco seligi bese uMashamaite ehlabana ngomklomelo womdlali ovelele uzoqeda umkhokha weminyaka emihlanu abadlali abawina iligi bezitshwa kowomdlali ovelele.
Abadlali asebeke baqokwa njengomdlali ovelele:
1996/97 Sibusiso Vilakazi Umgadli Zimbabwe
1997/98 Raphael Chukwu Umgadli Nigeria
1998/99 Pollen Ndlanya Umgadli South Africa
1999/00 Siyabonga Nomvete Umgadli South Africa
2000/01 Benjani Mwaruwari Umgadli Zimbabwe
2001/02 Andre Arendse Unozinti South Africa
2002/03 Mbulelo Mabizela Isitobha South Africa
2003/04 Tinashe Nengomasha Isitobha Zimbabwe
2004/05 Collins Mbesuma Umgadli Zambia
2005/06 Surprise Moriri Esiswini South Africa
2006/07 Godfrey Sapula Esiswini South Africa
2007/08 Elias Pelembe Esiswini South Africa
2008/09 Lucas Thwala Isitobha South Africa
2009/10 Daine Klate Esiswini South Africa
2010/11 Thulani Serero Esiswini South Africa
2011/12 Siyabonga Nomvete Esiswini South Africa
2012/13 Itumeleng Khune Unozinti South Africa
2013/14 Sibusiso Vilakazi Esiswini South Africa