NAMILE MKHIZE
L UGUBHA iminyaka engu-20 uhlelo lwethelevishini olufundisa ngezempilo nezinye izimo, i Soul City.
Lolu hlelo oselubuya nesizini ka-12 lwaqala ukudlala kuleli ngo-1994 kanti seluziwinele izindondo ngokuba namagalelo emphakathini waseNingizimu Afrika.
Isizini entsha ye Soul City eneziqephu ezingu-26, iqale ukudlala kuthelevishini izolo, ngo-8.30 ebusuku, kuSABC 1.
Okugqamayo kule sizini wukuthi kunabalingisi abaningi abasha nabaqalayo ukulingisa, phakathi kwabo okubalwa uNondlalo Ndlovu, Nunu Khumalo, Tau Maserumele, Robert Mpisi, Simo Magwaza no-Austin Shandu.
Kukhona noPhila Mazibuko, Vuyelwa Booi noLerato Mvelase, kanjalo nezinkakha zawo lo mdlalo uLilian Dube (Sister Bertina), David Denis (Sol Grootboom), Sindi Dlathu (Nomfundo Dladla) noFlorence Masebe (Sis Noni).
Emcimbini wokwethula lo mdlalo obuseRandlord, eBraamfontein, eGoli, obungeledlule, kuvele ukuthi le sizini izobe ikhethekile njengoba izodlala ngonyaka okugujwa ngawo iminyaka engu-20 iNingizimu Afrika yakhululeka ekubeni nawo lo mdlalo usuneminyaka engu-20 utshengiswa kuthelevishini.
Kuvezwe nokuthi lolu hlelo selube namagalelo abalulekile emphakathini wakuleli njengoba kudlalwe i-video yabantu bakuleli asebesizwe yilo.
Omunye umzali uthe i Soul City yamsiza ukuthi abe nobudlelwane obungcono nengane yakhe lwaphinde lwamqwashisa ngezifo ayekade engazazi.
Abadidiyeli balo mdlalo baveze ukuthi abantu ababukela i Soul City bafunda kabanzi ikakhulukazi ngengculazi, ukuhlukunyezwa kwabantwana nabantu besifazane, isifo sikashukela, iBP nezinye izifo.
Ngo-1997 bathola ukuthi nentsha ilulandela kakhulu lolu hlelo, yingakho basungula olunye olugxile kakhulu kuyona i Soul Buddies.
URashid Galant we Soul City uthe lo mdlalo usabuya nalo ulwazi oluzofundisa abantu.