MCEBO MPUNGOSE
UKUBA yivela kancane kwemicimbi eyenza imindeni ukuthi ibe ndawonye kuvulele abahleli be-iBeach Xperience indlela yokuthi baze nokuhlukile okuzothokozisa imindeni efuna ukujabula ndawonye ngoDisemba.
Lokhu kuvezwe ngumgqugquzeli walo mcimbi u-Akhumzi Jezile, ongumlingisi ophinde abe ngumethuli wezinhlelo kuSABC 1. Lo mcimbi uzobe usebhishi laseDokodweni eMandeni ngempelasonto yomhlaka-27 no-28 Disemba. u-Akhumzi uthi kungalindelwa intokozo kuphela, kudlalwa imidlalo yasemanzini neminye nosaziwayo, kunandisa nabaculi bakuleli abahamba phambili.
“Lesi yisikhathi semicimbi eminingi othola ukuthi iqala ebusuku iphele ekuseni ngovivi engavumeli ukuthi imindeni ihambe ndawonye ngenxa yezindawo esuke ikuzo.
“I-iBeach Xperience ngakolunye uhlangothi yenzelwa endaweni evulekile eyenzelwe ukuthi imindeni ilale kuyona kuma-camp ibe ndawonye,” usho kanje.
Emidlalweni ezobe idlalwa kubalwa ukutshuza ngezithuthuthu zasemanzini nokugwedla ezikebheni ezincane. Abantu bazohlabeka umxhwele ukuzwa ukuthi kwabazobe benandisa kunoLulo Café, DJ Naves, DJ Warras, DJ Sphectacula, DJ Happy Gal, DJ Vincenzo, DJ Tira, DJ Cyndo, Big Nuz, Duncan, Naima K nabanye. Kosaziwayo kuzobe kukhona uLerato Kganyago, Tsholofelo Masego, Luthando Shosha, Mzambiya nabanye.
Ngokokuqala ngqa eminyakeni emithathu isunguliwe i-iBeach Xperience, kuzobe kudayiswa kudliwa inhlanzi njengoba kuzobe kukhona iSeaside Fish Market. Le ndawo izobe ivulelekile ukuthi kungenwe kusukela emini nantambama kodwa emicimbini yasebu-suku kungenwa ngamathikithi. Inani lamathikithi atholakala kumaComputicket liqala ku-R150, iGolden Circle ibiza u-R230, aweVIP abiza u-R400. U-Akhumzi uphinde wathi kuzoba nebhasi elizothatha abantu kuPine Street eThekwini libayise eDokodweni.
Uma ufuna eminye imininingwane ungala-ndela ekhasini labo ku-Facebook i- iBeach Xperience noma kutwi-tter: @ibeachXperience.