ZAKHELE XABA
UZOFONGQA isigqoko enhlanganweni iWorld Boxing Association (WBA) mayelana nempi yesicoco somhlaba uphromotha kaSimpiwe “V12” Vetyeka owine ibhande le-interim WBA featherweight ngempelasonto.
UVetyeka uhlule ngomngqimuzo womlalisa phansi ngomzuliswano wesine uRudolfo Puete waseColombia empini ebiseSelborne Tennis Court, e-East London, ngoMgqibelo ebusuku. Le mpi ibiseqhulwini kwebezihlelwe ngu-Andile Sidinile weSijuta Promotions.
Ngokunqoba uVetyeka uzibeke ethubeni lokulwela ibhande le-WBA regular eliphethwe nguJesus Andreas Cuellar wase-Argentina. Ele-WBA super liphethwe nguLeo Santa Cruz waseMexico.
Emuva kwempi uSidinile uthe bazokhothama ku-WBA mayelana nokuthi inikeze uVetyeka ithuba lokulwela ibhande likaCuellar ngoMashi ngonyaka ozayo. UCuellar wawina i-WBA interim ngo-2012, walivikela kubashayisibhakela abathathu ngaphambi kokuthola ithuba lokulwela ibhande “elangempela” nokwenzeka nyakenye ebhekene noVic Darchinyan wase-Armenia.
Uhlelelwe ukulivikela ibhande lakhe kuJonathan Oquendo wasePuerto Rico empini ezoba seNew York ngoDisemba 5. Nokho uSidinile ufuna ukuthi kusheshe kuVetyeka ohlwithwe ele-WBA super nyakenye ehlulwa nguNonito “Filipino Flash” Donaire wasePhilippines empini eyalandelwa yizikhalo.
“Ngizoya embuthanweni we-WBA ozoba sePanama ngoDisemba 13 lapho ngizolukhuluma udaba lokuthi uVetyeka alwele ibhande lomhlaba,” kusho uSidinile.
“Nginethemba lokuthi uma kwenzeka besivumela, impi izoza eNingizimu Afrika. Kodwa kuleliya zinga kukhuluma imali.”
Ngokuwina ngoMgqibelo, uVetyeka uphinde wavikela ngempumelelo ibhande le-WBA International. Kweye impi uXolisani “Nomeva” Ndongeni uwine ibhande le-International Boxing Organisation (IBO) lightweight ehlula uJasper Seroka ngomngqimuzo womlalisa phansi ngomzuliswano wesishiyagalombili. UNdongeni, ongakaze ahlulwe ezimpini ewgu-20, ulaxaze wonke amabhande abewaphethe ezinyangeni ezedlule ngoba esebabele elomhlaba. Uyiqale kahle impi kodwa wabuya wavumela uSeroka abuye emzuliswaneni wesihlanu. Ngesikhathi ebona ukuthi liyamshonela, uNdongeni ubuye ngomfutho kowesishiya-galolunye, wathumela odalimede bezibhakela abebezingenela kuSeroka engasaphindiseli. Lokhu kuholele ekutheni unompempe uLulama Mtya ayiqede impi.
Khonamanjalo, ezimpini ebezise-Oliver Tambo Sports Centre, eKhayelitsha, eKapa, uNkululeko “Bull Dog” Mhlongo uwine ibhande le-interim WBA Pan African super welterweight ehlula ngamaphuzu uChristiano “The Warrior of Faith” Domassy wase-Angola.