LUNGILE MAJOKA
U KAPUTENI weMamelodi Sundowns u-Alje Schut uhlonishwe ngomklomelo womdlali wonyaka kuleli qembu emcimbini obungempelasonto ePitoli omnikeze u-R425 000 obusukwini obubodwa.
USchut odabuka eHolland uqokwe ngozakwabo njengePlayers Player of the Season wahamba no-R175 000, waphinde wathola umklomelo womdlali oshaye into ecokeme kuSundowns ngesizini edlule esongwe ngokuthi leli qembu laseChloorkop libe ngompetha be-Absa Premiership. Lo mkhakha wona uhambisana no-R250 000.
USchut udlala kuSundowns ngobuzwe bakuleli, abuthola ngombandela wokuthi wakwazi ukuqinisekisa uMnyango wezaseKhaya ukuthi akasona isilambi, eqinisekisa ukuthi kwelakubo unayo imali elinganiselwa ku-R7.5 million.
Omunye umdlali ophume ebomvu nguTeko Modise osanda kuhlonishwa ngomklomelo weGauteng Sport Personality of the Year. UModise ugixatshezwe ngo-R175 000 ngokuba wumdlali oshaye into ecokeme enkundleni.
Kulo mcimbi umengameli weSundowns, uPatrice Motsepe, ucashunwe ethi abadlali iSundowns ebaboleka amanye amaqembu kumele bavunyelwe ukuthi baboshelwe uma sebedlala neqembu lakhe.
“Angithandi ukubona abadlali bengadlali. Uma umdlali engekho ezinhlelweni zomqeqeshi kumele adedelwe ayodlala kwenye indawo futhi adlale uma kubhekenwe neSundowns,” kusho uMotsepe kuNewswall.co.za.
ISundowns isizakhele udumo ngokusayinisa abadlali ubuthaphuthaphu kodwa igcine abanye ingabasebenzisanga bese ibaboleka amanye amaqembu.
Umbandela ohambisana nalokhu kubolekisana owokuthi umdlali akavunyelwe ukuthi aboshelwe esikimini uma sekubhekenwe neSundowns.
Amaqembu ayizisulu zalokhu, yiMaritzburg United eboleke u-Abel Mabaso, Kwanda Mngonyama noSibusiso Kumalo abangazange babonakale ngesikhathi iTeam of Choice idlala neSundowns emdlalweni wokuqala we-Absa Premiership.
IMpumalanga Black Aces ibisesimweni esifanayo ngesizini edlule iboleke uMabaso noThemba Zwane. ISuperSport iboleke uDove Wome kanti iBloemfontein Celtic itsheleke uMukuka Mulenga noMusa Nyatama.
UJose Ferreira oseyisikhulu kuBidvest Wits, okunguyena owafika nalo mkhuba kuSundowns, usanda kucashunwa ohlelweni lweMetro FM, i-O83Sport@6 with Robert Marawa, ezishaya isifuba ngawo ethi empeleni akusikhona ukuthi abadlali ababolekisiwe abangadlali neqembu elingumnikazi kodwa umbandela uthi iqembu elibolekile kumele likhokhe isamba esithile, ukuze likwazi ukubophela umdlali othintekayo. Kusasa iSundowns izodlala neMoroka Swallows kowe-Absa Premiership eDobsonville Stadium ngo-7.30 ebusuku. Leli qembu alikanqobi kuligi, nokwenze abanye abalandeli bacasuka bademelayisa umqeqeshi uPitso Mosimane.
UMotsepe uthe ngeke bakumele lokhu, iqembu kumele lesekwe ngaso sonke isikhathi, encoma umsebenzi kaMosimane wokubalethela indebe ngemuva kweminyaka eyisikhombisa bengayazi injabulo eChloorkop.
n Uhla lwemiklomelo yeSundowns:
n Player Player of the Season: Alje Schut (R175 000)
n Player of the Season: Alje Schut (R250 000)
n Young Player of the Season: Bongani Zungu (R100 000)
n Top Goal Scorer: Katlego Mashego (R150 000)
n Playmaker of the Season: Teko Modise (R175 000)
n Best Youth Coach: Rhulani Mokwena (R60 000)
n ABC Motsepe Player of the Season: Khayelihle Shozi (R50 000)
n U/19 Player of the Season: Motsie Matima (R40 000)
n U/17 Player of the Season: Tebogo Rathlogo (R30 000)
n U/15 Player of the Season: Khulekani Kubheka (R20 000)
n Ladies Player of the Season: Smangele Mhlongo (R30 000)