CHARLES KHUZWAYO
O BEYISILOMO soMhlobo Wenene uSaba “DJ Napkin” Mbixane usezingwazini ezingasekho ezizohlonishwa ngomklomelo weHall of Fame kumaMTN Radio Awards emcimbini ozoba seSandton Convention Centre, eGoli, ngo-Ephreli 18.
Amagama abazohlonishwa amenyezelwe izolo kwi-website yale miklomelo.
UMbixane, obesakaza uhlelo lukamaskandi iLavuth’ IBhayi noluthi Siwel’UThukela, wadlula emhlabeni engozini yesithuthuthu eyamehlela ngoFebhuwari 26.
Washona ngemuva kweminyaka engu-30 eyibambile kwezokusakaza futhi esewole imiklomelo engu-19.
Kulo mcimbi uMbixane uzobungazwa nezinkakha okubalwa kuzona uTony Blewitt, Lance James, Alan Khan, Julian Lurie noSoon Zevenster.
Khona izolo kubuye kwamenyezelwa namagama eziteshi eziqokwe emkhakheni weBest Station of the Year.
Nakulo mkhakha luphinde lwakhala ngaphansi Ukhozi njengoba lingabonakalanga igama lalo eziteshini ezihamba phambili eqoqweni lePublic Broadcaster (PBS).
Eziqokiwe yiLotus FM, Motsweding FM, Radio 2000, Thobela FM noMhlobo Wenene FM kanti eqoqweni leBright Stars Club kuqokwe u-Andrew Joe weLukhanji FM, Nontsikelelo Kalipa we-UJFM, Tsepo Khomari wePower FM, Khatija Nxedlana we-East Coast Radio, Kudzayi Kwaang Tiribabi weMix FM, Busisiwe Titi woMhlobo Wenene noCharita van der Bergh weMFM.
Oyinhloko yeMTN Radio Awards uLance Rothschild uthe bayaziqhenya ngabaqokwe kwiStation of the Year ngoba kuhlulele amajaji ahlonishwayo.
“Sithole izincomo ezibabazekayo ngabaqokwe emkhakheni weBright Stars Club nakoweHall of Fame. Ngemuva kokucubungula kabanzi, sizobhala amagama abazothola umklomelo weBright Stars Club (okuwumklomelo wabasakazi okukholakala ukuthi banekusasa eliqhakazile kule ndima) noweHall of Fame,” kuphetha uLance.