PHUMLILE NTSELE
Ebika eseMsinga
U MSAKAZI woKhozi FM uKhathide ‘Tshathugodo’ Ngobe ubhoboke okokuqala phambi kwezinkulungwane zabalandeli bakamaskandi emngcwabeni kaMtshengiseni ‘Indidane’ Gcwensa obuyizolo, ngobudlelwano obujulile bakhe nomufi.
Lo msakazi ungene esteji kwachwaza inkundla abalandeli beNdidane bemjabulela maqede wageqa amagula ngobunzima athi wabuthola kubathandi bakamaskandi ngenxa yokusebenza kwakhe nalo mculi.
“Ngaphenduka isitha kwabanye abalandeli beBhova nabaphathi balo bengisola ngokuchema neNdidane. Ngithi angibhoboke okokuqala nokugcina ngokuhlupheka engabhekana nakho ngiqanjelwa amanga ngabebehlose ukungixoshisa emsebenzini,” kusho uTshatha.
Lesi silomo sithe ukube owayengumphathi woKhozi FM uWelcome “Bhodloza” Nzimande nowayeyi-marketing manager uMlamuli Nxele babe ngenawo umgogodla oqinile ngabe yena waphuma ngesango kudala kulo msakazo.
“Ngase ngiboshelwe amanqina enyathi ngabanye babaphathi boKhozi. Kukhona ovovoliyakhipha ababehlala ngegama lami kubaphathi. Inhloso ukuthi kwakumele ngibe mubi kubaphathi bami ngoba kukhona ababezitshela ukuthi mina ngangicheme noMtshengiseni,” kusho uTshatha .
Uthe yena akakaze abe yisitha neBhova kodwa babedlala ubuxoki nomona ngenxa yokudlondlobala kweNdidane.
Uveze ukuthi leli qeqebana lalimnyundela kubaphathi bakhe abaseGoli bethi uyagwazelwa futhi useze wathengelwa amatekisi yiqembu Amageza Amahle okuqopha kulo iNdidane.
Uthathe isikhathi evula isifuba sakhe nangobudlelwano bakhe obabhuntsha nengoduso yakhe eyamfaka ucu phambi kwezindimbane eMandeni ngo-2007 uNksz Mbali Shivambu.
“Bona abalandeli beBhova ngendlela abebengizonda ngayo beza kimi bazongitshela emehlweni bengihleka bethi ngithathelwe intombi yiBhova. Akudikizanga nqulu ngoba ngasenginonyaka ngihlukene nayo vele futhi angizange ngilizonde iBhova uma lashela intombi laqonywa. Ngiyavuma ukuthi nginabo ubuthakathaka bokulobola izintombi uma nje zizinhle niyakwazi nani lokho,” kusho uTshatha.
Uqhube wathi konke lokhu wagcina etholile ukuthi ngamanga abebehlose ngayo ukudicilela phansi isithunzi sakhe. Ubonge, wavalelisa kwiNdidane wayincoma nangobuqhawe kwaze kwafika usuku lwayo lokudlula emhlabeni.