UKUQONDANA kokusayina kukaPhilani Zulu kwiKaizer Chiefs nokudlula emhlabeni kwenkakha yeGlamour Boys uMichael “Bizzah” Dlamini kuzoqongisela lo mdlali inselelo yokuvuselela umsizilo oshiywe yile nsephe yangakubo ebiteketiswa ngelikaMonkey Jive.
UDlamini, odlale kwiChiefs ngezinsuku esungulwe ngazo ushone ngempelasonto edlule ngesifo sohlangothi kanti uzofihlwa namuhla, eHeroes Acre, eChesterville, eThekwini.
UZulu wethulwe ekuqaleni kwaleli sonto njengomdlali weChiefs.
Okufanele kwenze uZulu ahlale emanzonzo kwiChiefs wukuthi naye udabuka eMgungundlovu kanjalo noDlamini ubengowaseSobantu, elinye lamalokishi aseMgungundlovu.
Omunye waseMgungundlovu odlale kwiChiefs wagqama nguBomba Chamane naye obengowaseSobantu kanti noZulu uzofica omunye umkhaya wakhe eNaturena, uRyan Moon.
Obekwenza uDlamini angaconsi phansi kubalandeli beChiefs nakubaphathi bayo yibhola elihle ayedume ngalo namagoli ayewashaya nokuyizinto ezizolindelwa kuZulu.
Sekunesikhathi eside uZulu agcina ukudlala umdlalo ophezulu kwazise ibibambene ngezihluthu isizini yonke phakathi kwakhe neMaritzburg United.
Ubengafuni uZulu ukuvuselela inkontileka kwiMaritzburg ngoba ibimholela amakinati nokuphethe ngokuthi imkhiphe ezinhlelweni zayo zesizini yize amagalelo akhe eyisize yavika izembe ngosuku lokugcina luka 2015/2016.
UThabo Dladla obesethimbeni labaqeqeshi beqembu lesizwe le Under 23 elidlale kuma-Olympic Games eSydney, e-Australia ngo-2000 obazi bobabili uDlamini noZulu ushayele iChiefs ihlombe ngokuvuka ngoZulu.
“Basayinise umdlali okahle, onekhono futhi engikholwa wukuthi uzongena khaxa ezinhlelweni zeChiefs,” kusho uDladla.
“Ngiyamjabulela umfana ngokusayina kwiChiefs. Nemali ngiyethemba isizothi ukungena kangcono. Sekukuye ukuthi amukele inselelo adlale.”
UZulu usayina kwiChiefs ibilokhu ibalwe njalo emaqenjini abemfuna esalwa neMaritzburg. Akulindelwe afike athwale kanzima uZulu kwiChiefs kwazise useke wasebenza nomqeqeshi wayo uSteve Komphela onengcindezi yokuphendula amatafula kwazise kumasizini amabili edlule uqede ubuye nenduku yombangandlala nokucike abalandeli.
UZulu wethulwe kanye noTeenage Dladla obedlala kwiChicken Inn yaseZimbabwe, okwelanywe ukwethulwa ngoLwesine kukaBongolwethu Jayiya obegijima kwiCape Town City eqede ihlezi endaweni yesithathu kwi-Absa Premiership.