UMDLALI weKaizer Chiefs uSibusiso “Madoh” Khumalo uzibeke engcupheni yokuhlala ebhentshini kule sizini ka-2017/18.
UKhumalo odabuka KwaZulu-Natal (KZN) ungene ngesiwombe sesibili ngesikhathi Amakhosi equnjwa phansi yiChippa United eSisa Dukashe Stadium, e-Eastern Cape ngempelasonto.
Amakhosi aguqiswe yiChilli Boys ngo 1-0 wegoli likaKatlego “Mahoota” Mashego ovalele enethini ingcwenga ye-free kick ngomzuzu ka-90.
Kule sizini uKhumalo uzobanga ijezi noPhilani Zulu noTsepo “Chester” Masilela. Ngempelasonto uMasilela ubephunyuziwe. UZulu nguyena oqale umdlalo kwathi ngesiwombe sesibili kwangena uKhumalo.
Uthe engena nje wenza iphutha njengoba ephasele umgadli weChippa uMoeketsi Sekola ibhola ngekhanda ethi uzama ukuliphasela uBrilliant Khuzwayo ezintini zaMakhosi, uSekola udonse imbumbulu yeshodi eshaye ipali yabuyela emuva.
Leli nxele lenze leli phutha kungakapheli ngisho imizuzu lingenile enkundleni. Lifike kuMakhosi ngesizini edlule lisuka kwiSuperSport United. Isikhathi esiningi ubephazanyiswa wukulimala ngesizini edlule.
UKhumalo uqhubekile nokuzikhipha ezinhlelweni zikaKomphela ngesikhathi ebamba uMashego obeqaqa ngejubane ebheke kuKhuzwayo ezintini zeChiefs, leli nxele limbambe ingcaca. Unompempe akazange acucuze wakhiphe ikhadi elibomvu waligixabeza uKhumalo.
Ngemuva kwalokho uMashego uthathe i-free kick wayithumela enethini kwazise uKhuzwayo utshelwe yizihlwele ukuthi isisenethini.
Ngemuva komdlalo umqeqeshi uSteve Komphela uveze ukuthi weneme ngabanye abadlali abanike ithuba lokudlala.
“Phakathi kwezinto ebesizibhekile wukunika abanye abadlali bethu ithuba. Ngeneme ngabadlali abaningi abathole ithuba lokudlala namuhla (esho ngoMgqibelo). Umdlalo wanamuhla unginike ulwazi oluningi ngeqembu lami. Sesibheke izinto eziningi. Ngesiwombe sokuqala ngicabanga ukuthi sikhombise okukhulu ukuhleleka.
“Lena bekungenye yezingxenye ebesifuna ukubona ukuthi siqine kanjani kuyona. Besifuna ukuhlala emuva sigcine ibhola bese senza isiqiniseko sokuthi abalugqobhozi udonga lwethu lwasemuva. Okunye ebesikubhekile wukuthi siphuma kanjani emuva uma sesiphethe ibhola ngemuva kokuhlaselwa yizitha. Ngicabanga ukuthi lokho sikwenze kahle kakhulu. Ngesiwombe sesibili bese singcono kakhulu uma sihlasela. Seneme ngesikubonile,” kusho uKomphela.
Kulo mdlalo uKomphela unike abadlali abangajwayele ukudlala nabasha ithuba lokuzibonakalisa. Ezinhlangothini emuva uqale ngoKgotso Moleko noPhilani Zulu kwathi phambili wahlasela ngoJonathan Phillipe wase-Argentina osazama inhlanhla.
Esiswini ubeyibamba ngoBhongolwethu Jayiya kwathi ngesiwombe sesibili wafaka uDumisani Zuma noKhotso Malope.
IChiefs izobhekana neSuperSport United emdlalweni weMTN 8 eMoses Mbhida Stadium, eThekwini, ngo-8.15 ebusuku.