LUNGILE MAJOKA
ILULWE ngonyaka inkontileka kaVera Pauw oqeqesha iqembu lesizwe labasifazane iBanyana Banyana.
Ekuqaleni konyaka uPauw, odabuka eNetherlands, wanikwa inkontileka okwakuthiwa izophela ngemuva kweNdebe yoMhlaba eseCanada ngonyaka ozayo.
Inhloso yokuqasha uPauw kwakuwukuthi afake iBanyana ku-African Women Championship (AWC) obekuwumqhudelwano obekuzohlungwa ngawo amaqembu azomela i-Afrika kwiNdebe yoMhlaba.
Sekuyindaba endala ukuthi uhlulekile wukuyisa iBanyana eCanada njengoba bahlulwa yi-Ivory Coast emdlalweni wokuhlungela indawo yesithathu ku-AWC okwakuzosho ukuya kwiNdebe yoMhlaba.
Izindaba zokululwa kwenkontileka kaPauw ziqinisekiswe okhulumela inhlangano eyengamele ibhola kuleli, iSouth African Football Association (Safa), uDominic Chimhavi.
Lokhu kuchaza ukuthi uPauw uzothola ithuba lokuhlanganisa kahle iqembu lakhe aphinde abize nabanye abadlali abasebancane abangase bathathe izindawo zalabo osekufuneka bashenxe.
Khonamanjalo iqembu laKwaZulu-Natal, iDurban Ladies, kulibhedele emdlalweni walo wesibili kuSasol League National Championships ebanjelwe Kwazakhele, ePort Elizabeth.
IDurban Ladies ibhudluzwe ngo-4-0 yiPalace Super Falcons yaseGauteng izolo ekuseni. Leli qembu laseThekwini belivule lo mqhudelwano ngegiya eliphezulu lihlula iCoal City Wizards yaseMpumalanga ngo 4-1 ngoMsombuluko.
Emdlalweni wayizolo kuyiwe ekhefini iFalcons ihamba phambili ngo-2-0, esiwombeni sesibili iLadies egabe ngabadlali abanesipiliyoni beBanyana u-Amanda Dlamini noSilindile Ngubane, ihlulekile wukubuya kunalokho iFalcons yaqhubeka nokuyibhakuzisa inethi.
IFalcons isibe ngompetha balo mqhudelwano izikhawu ezintathu. Ikhiphe ompetha banyakenye, iMamelodi Sundowns ngesikhathi kudlalwa ama-Play Offs okukhipha umpetha waseGauteng.
Iqembu elizoba ngompetha kwayisishiyagalolunye ahlangane Kwazakhele lizohlomula ngo-R50 000 kanti umdlalo wamanqamu uzoba ngeSonto, uzokhonjiswa bukhoma ku-SABC 1. ILadies idinga ukuqeda ibalwa namaqembu amabili aphezulu eqoqweni layo ukuze idlulele kuma-quarterfinal.