Advertisement
logoSections

Bafisele iSilo unwele olude

INTATHELI YESOLEZWE

UNDUNANKULU waKwaZulu-Natal uDkt Zweli Mkhize usehlanganyele nesizwe sonke ukuhalalisela iSilo samaBandla njengoba namhlanje sigubha usuku lokuzalwa.

ISILO samaBandla noNdunankulu wesifundazwe uDkt Zweli Mkhize bathathwa ngesikhathi kuvulwa isiShayamthetho eMgungundlovu. Credit: INLSA

Namahlanje uHlanga loMhlabathi luhlanganisa iminyaka engu-64 ubudala kanti luzogubha lolu suku ngokuthi luhlanganyele nabantu abadala esigodlweni kwaLinduZulu .

UMkhize uthe kuyintokozo njengesifundazwe ukuthi iKwaZulu-Natal ibusiswe ngokuba neSilo esesiphile isikhathi eside kangaka .

“Kule minyaka esidlulile iNgonyama yethu ikhombise obukhulu ubungani nokumela ngenhlonipho isizwe samaZulu kubantu bakwamanye amazwe abasuke bevakashele lesi sifundazwe nokwenza bahambe besathokozile futhi bengawuvali umlomo ngaso,” kusho uMkhize.

Imiyalezo yokufisela iSilo usuku oluhle ibisalokhu ingene njalo iqhamuka nhlangothi zonke lapho kuhahaliselwa ukuhlanganisa kwaso iminyaka engu-64.

ISilo singesokuqala emlandweni kaZulu ukubusa iminyaka engaphezulu kuka-40 kusuka kokhokho baso abadala oSenzangakhona noShaka nabanye ababubeke ebalazweni ubukhosi bakwaZulu.

Kwenzeka lokhu nje kuzothi ngo-2016 isizwe samaZulu sihlanganise iminyaka engu-200 saba khona kusuka emandulo.

ISilo siphinde sinconywe kakhulu ngeqhaza laso elikhulu esilibambile ekulwisaneni nezifo phakathi kwazo okubalwa igciwane lengculazi nokunye okukhubaza isizwe nabantu abasha.

Njengamanje kuseyiso sodwa esisathola ukuhlonishwa okwehlukile njengoba ezifundazweni zaseNingizimu Afrika yisona kuphela esinethuba lokuvula isiShayamthetho sesifundazwe.

SHOW ALL
Advertisement