KUGIYA abagadli baKwaZulu-Natal (KZN) embangweni womklomelo womdlali oshaye amagoli amaningi kuNational First Division (NFD).
Abagadli bamaqembu aseKZN yibona abazihola phambili ngokushaya amagoli esigabeni esiphakela i-Absa Premiership ngamaqembu.
Onemagoli amaningi kuNFD nguSedwyn George weRoyal Eagles. Ngemuva kwemidlalo ewu-20 umgadli odabuka eMgungundlovu useshaye amagoli awu-18 emidlalweni yeligi.
UGeorge yisizini yakhe yokuqala le kuNFD. Amagoli akhe asesize i-Eagles yahlala endaweni yesithathu ku-log yeNFD ngamaphuzu awu-32 emidlalweni ewu-20.
I-Eagles ihlukaniswe amaphuzu ayisishiyagalolunye neThanda Royal Zulu eseqhulwini ngamaphuzu awu-41 ngemuva kwemidlalo ewu-20. NgoMgqibelo ngo-3.30 ntambama uGeorge uzothola elinye ithuba lokwandisa isibalo sakhe samagoli uma i-Eagles isiyamukela iFC Cape Town emdlalweni weNFD eHarry Gwala Stadium, eMgungundlovu.
UMhlengi Cele ogijima kuMabhubesi nguyena ohlezi endaweni yesibili kubagadli asebeyibhakuzise kaningi inethi. UCele, oke wayibamba kuChippa United edlala esigabeni esikhulu, usebasele enethini amagoli awu-15 emidlalweni ewu-20 yeligi.
Njengamanje uCele usele ngamagoli amathathu kuGeorge. Amabhubesi ahlezi esicongweni ngamaphuzu awu-41. Avule igebe lamaphuzu ayisishiyagalombili kuBlack Leopards ehlezi endaweni yesibili ku-log.
NgoMgqibelo Amabhubesi azocothulana amakhilane neMilano United FC e-Athlone Stadium, eKapa, ngo-3.30 ntambama emdlalweni weligi. UCele kubhekwe ukuthi aqhubeke nefomi yakhe enhle phambi kwamapali.
Endaweni yesithathu kukhona uSiyabonga “Bhele” Nomvete ogijima kuMaZulu. Insika yomgadli, uNomvete useqhulule amagoli awu-13 emidlalweni ewu-20 yeligi. Ngeke adlale kusasa ngo-7.30 ebusuku uma Usuthu seludlala nePlatinum Stars eRoyal Bafokeng Stadium emdlalweni weLast 32 yeNedbank Cup ngenxa yokuthi uthintekile emdlalweni odlule.
Nokho umqeqeshi woSuthu, uJoey Antipas, ukuqinisekisile ukuthi uzobe eseluleme uma ezakhe sezidlala neWitbank Spurs ngeSonto ngo-3.30 ntambama ePrincess Magogo Stadium, KwaMashu.
UGeorge, Cele noBhele bathemba ukuthi bazolandela ezinyathelweni zikaNkosinathi Mthiyane, David Zulu noPhumelele “Ace” Bhengu bonke asebeke bahlabana ngomklomelo womgadli oseshaye amagoli amaningi kuNFD.