IZOKHOKHA izikweletu zanyakenye iPremier Soccer League (PSL) ngoMsombuluko ezokwethula imiklomelo yabadlali nabaqeqeshi abebevele ezinyangeni ezintathu zokugcina zika-2016 okuwu-Okthoba, Novemba noDisemba emahhovisi ayo aseParktown, eGoli.
Ngokusho kukaLuxolo September wophiko lwezokuxhumana kwiPSL kulo mcimbi ozoqala ekuseni nophuthumayo kuzokwethulwa neqembu elikhale lemuka ne-Q1 ye-Q Innovation ehambisana nentshontsho elinonile lika-R1.5 million.
“Lokhu okuzokwenzeka akujwayelekile kodwa siphoqelekile ukuqhamuka nendlela yokulungisa okonakale nyakenye kwazise size sasongwa isigamu sokuqala singakwazanga ukukhipha le miklomelo. NgoMsombuluko sizokhipha imiklomelo yezinyanga ezintathu; * -Okthoba, Novemba noDisemba. Imiklomelo yabavelele emikhakheni yomdlali nomqeqeshi wenyanga.”
USeptember uqinisekise neye-Q Innovation. “Kwi-Q Innovation kubalulekile ukukhumbula ukuthi kunemidlalo eminingi ehlehle ngesigamu sokuqala sonyaka odlule.
"Leyo midlalo yiyo eke idide uma sekukhishwa i-Q Innovation nayo ezokhishwa ngoMsombuluko.”
Ukhipha lezi zindaba nje uSeptember ubebuzwa ukuthi kungani iPSL ize yayikhipha ekuqaleni kukaFebhuwari imiklomelo yomdlali nomqeqeshi abavelele ekuqaleni kwesizini. I-PSL iklomelise ngoMsombuluko umdlali wasemuva weKaizer Chiefs uLorenzo Gordinho njengobevelele ngo-Agasti nangoSepthemba. Umqeqeshi obevelele kube wuClinton Larsen weLamontville Golden Arrows.
“Kuningi ukuphazamiseka obekhona ngonyaka owedlule ngezinyanga zokuqala zesizini ka-2016/2017.
"Uma singabuyekeza zona lingashona. Okusemqoka wukuthi ngemuva kokukhishwa kwemiklomelo ebisilele ngoMsombuluko kuzobe sekuqhubeka ngendlela ejwayelekile ezinyangeni ezisele kusukela ekupheleni kukaFebhuwari kuze kusongwe isizini.”
Abadlali okubhekwe bahlomule ngemiklomelo yokuvelela kulezi zinyanga ezibalwa wuSeptember zokugina zika-2017 kungabalwa uLebogang Manyama weCape Town City noTendai Ndoro abebevuke indlobane ngamagoli.
Emaqenjini angase emuke ne-Q Innovation kubalwa iGolden Arrows eke yaqhwakela, iCape Town City, Bidvest Wits, SuperSport United ne-Orlando Pirates.
IMamelodi Sundowns yize yenze kahle kodwa igcine isidlala imidlalo ye-Q Innovation yesibili ngenxa yokuhlehla kwemidlalo yayo eminingi ka-Q1 ngesikhathi isematasa ijaha iCaf Champions League egcine ngokuyinqoba.