USEPHUPHA ngokuyodlala kwiCaf Confederation Cup umqeqeshi weLamontville Golden Arrows uClinton Larsen.
NgeSonto ngo-3 ntambama Abafana Bes’thende bazoshukana ne-Orlando Pirates ePrincess Magogo Stadium, KwaMashu emdlalweni owandulela owamanqamu eNedbank Cup.
Iqembu elizonqoba kulo mdlalo lizodlala nozonqoba phakathi kweChippa United neSuperSport United abazotholana phezulu
kwi-semi final yokuqala ngoMgqibelo ngo-3 ntambama eNelson Mandela Bay Stadium, eBhayi.
Umdlalo wamanqamu uzodlalelwa eMoses Mabhida Stadium, eThekwini ngoJuni 24. Iqembu elizonqoba lizohlabana ngo-R7 million liphinde liyodlala kwiConfederation Cup.
ISuperSport iyona evikela isicoco seNedbank. ULarsen exoxa nabezindaba ngemuva komdlalo wezakhe we-Absa Premiership neBaroka FC eMagogo ngoMgqibelo ntambama, uphumele obala ngesifiso sakhe sokubona i-Arrows idlala kwiConfed Cup.
“Le midlalo esele izocacisa ngesizini yethu. Ngikholwa wukuthi izocacisa ukuthi sizoba nesizini enhle noma ebhedayo yini. Uma sifinyelela kowamanqamu siphinde siqede kwiTop 8 kuyoba ngenye isizini eyohlale isezingqondweni zabaningi kwi-Arrows. Uma sidliwa kuma-semi final siphinde siphume kwiTop 8 kuyoba isizini engeyinhle. Ngakho imidlalo emithathu ezayo imqoka kakhulu kithina. Uma udle umhlanganiso kwiNedbank uthola ithuba lokuyodlala e-Afrika. Mina ngadlala kabili kwiCaf Champions League neManning Rangers ne-Orlando Pirates. Ngiyazi ukuthi kunjani ukudlala khona futhi ngingathanda nabadlali bami bezwe lowo muzwa,” kusho uLarsen.
“Uma uyodlala okokuqala e-Afrika usuke ungakakulungeli ukudlala khona ngokwanele. Into emqoka yisipiliyoni esikwenza uqine uma usudlala khona ngomuso. Isipiliyoni sokudlala e-Afrika sizobenza bakhule njengabadlali.”
NgoLwesithathu ngo-7.30 ebusuku Abafana Bes’thende bazodudulana neCape Town City e-Athlone, eKapa koweligi.