KUKHONYA uTina Jaxa kumaSouth African Film and Television Awards (Safta) njengoba ephinde waqokwa eminxeni emibili.
Igama likaTina (46) limenyezelwe emcimbini obuseForum, eBryanston, eGoli ngoLwesine.
Lo mlingisi uqokwe emunxweni weBest Actress (Drama) ngokulingisa indawo kaZinzi kwiSikizi nakwiBest Supporting Actress (Telenovela) ngokudlala indawo kaMay Gumede kwiGold Diggers.
Lo mlingisi waduma kwiGenerations neMadame & Eve, okuyimidlalo alingise kuyo eminyakeni eyedlule. Uma edla umhlanganiso kuzobe kungekhona okokuqala njengoba eke wahlabana ngendondo yeBest Supporting Actress ngokudlala kwiWhile You Were Not Looking nakwi-Intersexions.
Kulo nyaka kutonyulwe kakhulu amaciko asemnkantshubomvu okubalwa kuwo uBob Mabena weKaya FM, Leleti Khumalo, Siyabonga Twala, Clemintine Mosimane, Linda Sebenzo, Hlubi Mboya, Bonnie Mbuli, Tumisho Masha, Brenda Ngxoli nabanye.
Umcimbi wokumenyezelwa kwabahlabene uzoba seSun City, eNorth West ngoMashi 16-18 futhi uzosakazwa kuSABC2 ngoMashi 18. Isiqubulo salo nyaka sithi “INingizimu Afrika inakho-asikugubhe.”
Oyinhloko yeNFVF uZama Mkosi uhalalisele wonke amaciko aqokiwe kulo mqhudelwano wezindondo.