INDODAKAZI yeNtandane iyona kuphela kubaculi bakamaskandi esamele abesifazane ngokuba sethubeni lokungena kwi-top 10 emqhudelwaneni weSolezwe, iNgqwele kaMaskandi.
Izolo, kushaye * -3 ntambama isilele isithathu ngamavoti angu-1 739,
njengoba ilandela Osaziwayo abalele isibili ngamavoti angu-2 610.
UMroza Fakude usalokhu ebahudululile nje abanye omaskandi njengoba
esahamba phambili ngamavoti angu-3 058.
IGcokama Elisha lona lilele isine ngamavoti angu-1 430 lilandelwa ngamaGeza Amahle alele isihlanu ngamavoti angu-1 277.
UKhuzani “Indlamlenze” Mpungose ulele isithupha ngamavoti angu-1 221, ulandelwa yiMfezemnyama ngangu-900 kweyesikhombisa.
UGovozile naye ulokhu ezile njengoba esenangu-734 endaweni yesishiyagalombili, elandelwa nguBahubhe ngangu-552. UMjikijelwa yena usalele ishumi ngamavoti
angu-325.
Bakhona nabanye abaculi abasondelayo ngamavoti abo njengoba kuhlungwe amagama abangu-30 okuvotwa kuwo.
Wonke lawo mavoti athathwe ngehora lesithathu izolo ntambama. Ukuvotela abaculi abazongena kwi-Top 10, kusaqhubeka njengoba kuzovalwa ngoJanuwari 31 ngo-12 ebusuku.
Ukuvotela umculi omthandayo, uthumela umqhafazo ubhale ukuthi “ISOMASKANDI” nenamba yomculi omvotelayo ekhona ezikhangisweni esisephephandabeni, Isolezwe. Umqhafazo uthunyelwa ku-33258 kanti umqhafazo ubiza * -R1.50.
Kubavoti kunxuswa ukuthi babhale igama elithi ISOMASKANDI njengoba kubhaliwe ephephandabeni ngenhloso yokugwema ukulahleka kwamavoti abo. Imiklomelo ezowinwa izomenyezelwa ephephandabeni uma sekukhishwa uhlu lwabangene kwi-Top 10. Abavotayo bazozibeka ethubeni lokuhlomula njengoba kukhona imihlomulo abahlelelwe yona ngokuvotela kakhulu umculi abamthandayo.