BANGAPHEZULU kuka-50 000 abafundi abebefake izicelo bachithwa yisikhwama esixhasa abafundi ngemali iNational Students’ Financial Aid Scheme (NSFAS) kulo nyaka.
Lokhu kuvezwe nguSihlalo walesi sikhwama izolo uMnuz Sizwe Nxasana, ekhuluma esithangamini nabezindaba ePitoli onxuse laba bafundi ukuthi bafake isicelo sokubuyekezwa kwalesi sinqumo.
UNxasana uthe kunezicelo ezingu-3 760 zabafundi abachithiwe ezisacutshungulwa.
“Singakuqinisekisa ukuthi izicelo ezingu-53 043 zabachithiwe abebefuna ukufunda emanyuvesi nasemakolishi. Sesixhumene nalaba bafundi kanti kunohlelo lokufaka isimangalo kulabo abangalutholanga uxhaso. Kuvalwa ngoFebhuwari 28 ukufaka isimangalo kulesi sikhwama,” kusho uNxasana.
Uthe uNgqongqoshe weMfundo ephakeme uDkt Blade Nzimande ukuqinisekisile ukuthi lesi sikhwama sabelwe * -R15 billion kulo nyaka.
“Bangu-309 788 abafundi basemakolishi nasemanyuvesi asebethole uxhaso. Kulaba bangu-204 653 abasemanyuvesi babengu-105 135 abasemakolishi. Njengoba zivalwe ngoLwesihlanu izicelo zalabo abazofunda emakolishi silindele ukuthi sinyuke lesi sibalo cishe ngomunye * -100 000 okusho ukuthi ngale mali sizoxhasa abangaphezulu kuka-400 000,” kuqhuba uNxasana.
Uthe kuqala unyaka ngoJanuwari bakhiphe * -R1.3 billion bawunika izikhungo zemfundo ukuze abafundi babhalise ngaphandle kwezihibe.
Uqhube wathi abafundi ababexhaswe yilesi sikhwama nyakenye baphasa zonke izifundo zabo okungenani ngo-50% bazoxhaswa.
“Abafundi abasha ababefunda ezikoleni ezingo-Quintile 1, 2 no-3 (akukhokhwa nhlobo imali yokufunda) nalabo abahola imali yesondlo sabantwana nabo bazoxhaswa.”
Uthe uyazi kwezinye izindawo kube nobuhixihixi wathi bayazilungisa izikhalo zabafundi iningi labo abebexhaswe yilesi sikhwama.