BANGAPHEZULU kuka-1.3 million abantu abamnyama abaphakathi kuka-25 kuya ku-64 abangakaze bawubone umnyango wesikole.
U-9% kuphela wabantu abamnyama abafunde bathola iziqu uma kuqhathanisa nezinye izinhlanga.
Lokhu kuvezwe yiStatistician General, uDkt Pali Lehohla izolo ethula umbiko iCommunity Survey 2016 obheka ukufunda kwabantu bakuleli. Kulo mbiko kubhekwa nezibalo zabafundi basemanyuvesi nezemfundo jikelele kusuka emabangeni aphansi.
ULehohla uthe abantu abamnyama abaphakathi kuka-25 no-64 basilele emuva kwezemfundo.
“Lo mbiko uveza ukuthi * -38.3% wabantu abamhlophe yibona abafunde badlula kumatric uma ubaqhathanisa nabamnyama. Amakhaladi ame ku-8.1% kanti kubuye kuvele nokuthi bacela ku-15% abantu abamnyama abashiye phakathi izifundo bagcine emazingeni aphansi,” kusho uLehohla.
Lo mbiko uveza ukuthi abesifazane abangu-55.3% yibona abangafundile uma uqhathanisa nabesilisa abangu-44.7%.
Uqhube wathi iKwaZulu-Natal yisona sifundazwe esinabantu abaningi abangafundile abaneminyaka engu-25 kuya ku-64, ngabangu-337 536 kulandele iLimpopo ngo-251 827 neGauteng ngo-250 265.
“ITheku linabantu abangu-1.7 milion, abangu-71 409 babo abafundile, abangu-1.3 million bagcine kwa-matric kuthi abangu-216 068 baneziqu zasemanyuvesi noma emakolishi.”
Uthe intsha ephakathi kuka-15 no-34 engu-225 543 yakulesi sifundazwe ayifundile, e-Eastern Cape ingu-271 276 kuthi eGauteng ibe ngu-162 285 engafundile.
“Isiyonke intsha engafundile ingu-1.2 million. Efundile e-KZN ingaphezulu kuka-3 million, eGauteng ingu-4.3 million kuthi e-Eastern Cape ingu-2.3 million. Isiyonke intsha efundile ingu-18.6 million,” kusho uLehohla.
Uveze nokuthi inyuvesi i-Unisa iyona enesibalo esikhulu sabafundi ngabangu-336 944 ababefunda kule nyuvesi ngo-2015.
Ubalule ukuthi * -70% wentsha eneminyaka engu-20 no-34 iyona efunde ukudlula abazali bayo.
“Lentsha iyona engeyokuqala ukuthola iziqu emakhaya uma uqhathanisa nentsha emhlophe abazali bayo abasuke befundile. Ucwaningo luveze nokuthi labo bafundi abazali babo abafundile banamathuba okwenza kahle kakhulu ezifundweni zabo,” kusho uLehohla.