LUNGILE MAJOKA
OSENGUMQEQESHI obambile kuMaZulu FC, uDelron Buckely, ululeka abadlali abasakhula eNingizimu Afrika ngokuthi balibambe ngazo zombili ithuba abalitholayo lokuyohlolwa amaqembu aphesheya.
UBuckley ongomunye wabadlali baseNingizimu Afrika abazakhele igama ngokugijima kumaligi aphesheya, uthe ukwehla kwesibalo sabadlali baseNingizimu Afrika abathola amaqembu kumaligi aphesheya, kungenxa yokuthi bafike bazithele ngabandayo uma benikwa amathuba.
Lo mqeqeshi owayeyibamba ohlangothini lwesokunxele ngezikhathi zakhe uqale ukudlala ibhola ezingeni eliphezulu eGermany njengoba ahamba kuleli eneminyaka engu-17. Wadlalela iVFl Bochum, Arminia Bielefeld neBorussia Dortmund. Udlale nokuFC Basel eSwitzerland. Udlale okokuqala kuleli ngo-2012 esayina kuMaritzburg United.
Eqenjini lesizwe ubekhona kwelika-Under 23 elaba ngelokuqala ukudlala kuma-Olympic eSydney, e-Australia, ngo-2000. KuBafana udlale eNdebeni yoMhlaba ngo-1998 eFrance naseKorea/Japan ngo-2002.
“Into ekhona ngebhola nasempilweni wukuthi uyayidinga inhlanhla. Ngakho abadlali laba uma bethola ithuba lokuyohlolwa kumele balibambe ngazo zombili. Ithalente liningi eNingizimu Afrika kodwa abadlali uma beya kohlolwa bayabuya kuthiwe abekho ezingeni. Empilweni uthola ithuba kanye okumele ulisebenzise. Uma ungakwenzi lokho uzosala ngemuva.
“Abadlali abaningi abebeseqenjini lika-Under 23 ngo-2000 balisebenzisa ngendlela ephusile ithuba labo, ekugcineni iningi labo laba ngabanye babadlali abahle asebeke bakhiqizwa yiNingizimu Afrika,” kusho uBuckely.
Leli qembu akhuluma ngalo uBuckley lashaya iBrazil ngo 3-1 kuma-Olympic. Emdlalweni wokuqala lakhala ngaphansi ngo 2-1 kuJapan. Lashaywa iSlovakia ngo 2-1.
Iqembu leBrazil elaphuma kuma-quarterfinal lagcina linqobe iNdebe yoMhlaba ngo-2002.
“Kuleli qembu kwakukhona okungenani abadlali abayisishiyagalolunye abaneminyaka engu-19/20 abase bedlala phesheya. Ukube iSafa yasigcina ndawonye saze sanyukela kuBafana Bafana, nginesiqiniseko ukuthi nathi sasizofinyelela ezingeni leBrazil,” kusho uBuckely.
Kubadlali ayenabo eSydney asebehlonishwa ebholeni lakuleli ngabakuzuzile, kukhona uBenni McCarthy owanqoba isicoco seChampions League neFC Porto ngo-2004. USiyabonga Nomvete oseqeqeshwa nguBuckley kuMaZulu, usegijime kumaligi ahlukene phesheya, Matthew Booth, Nkosinathi Nhleko noQuinton Fortune bonke abadlale kumaligi aphesheya.
“Namanje sinalo ithalente elingenza siziqhenye eBrazil. Okubalulekile wukuthi umqeqeshi alihlanganise ngendlela iqembu lakhe,” kusho yena.
U-Owen Da Gama uzohola iqembu lika-Under 23 elizomela iNingizimu Afrika kuma-Olympic eBrazil ngo-Agasti. Liqhathwe neBrazil, Denmark ne-Iraq.