FANELESIBONGE BENGU
UZIME waKwaNongoma osethubeni lokuhlomula ngesicoco sikaMiss Teen Commonwealth South Africa, uKwenzakonke Mncwango, uthe amantombazane amaningi alova esikoleni ngenxa yokweswela amaqakelo (pads) nokuyingakho esewaqoqa enikela ngawo.
Ukuze anqobe kulo mncintiswano, okuzoba ngokwesithathu ukhona, uKwenza (19) kumele kube nenhlangano esiza umphakathi ayisebenzelayo.
Lo mfundi owenza unyaka wesibili kuBusiness Science eNyuvesi yaseKapa, uthe uqale inhlangano iRed Wings Projects phambilini ebiseGoli njengoba ebuye ahlale khona kwazise abazali bakhe basebenza khona.
“Bangaphezulu kuka-7 million abesifazane bakuleli abangakwazi ukuthola amaqakelo ngenxa yokuntula. Uhlelo lwethu luqoqela abesifazane abanjalo ukuze basizakale. Sihlela imicimbi yokuqoqa imali njengama-car wash nama-fashion show kuthi imali esiyitholayo sithenge ngayo. Sifuna babuyelwe wukuzethemba,” kusho uKwenza. Uthe amaqakelo awatholayo unikela ngawo ezikoleni zaseKhayelitsha, Gugulethu naseLanga.
Lo zime oxhaswe yiBlackTech Solutions, K Mac Photography, Tunashe Lifestyles, Phenomenal Media and MakeUp By MphoMoeng, uthe uqale ukumodela eneminyaka engu-12 kanti usehlomule ngemiklomelo eyehlukene kuhlanganisa noweLittle Queen of the World eBulgaria, e-Europe, ngo-2012.
Uthe ufuna ukusebenzisa uMiss Teen Commonwealth njengesitebhisi sokungenela uMiss South Africa uma eseqede isikole ngo-2018 ngoba akafuni ukuphazamiseka ezifundweni.
“Uma nginqoba lo mncintiswano ngoJulayi ngizothola ithuba lokuyomela uMzansi eLondon. Into engichaza ngawo wukuthi akusiwo nje umncintiswano ojwayelekile ngoba sifundiswa ngezinto eziningi ezizosisiza empilweni nathi sisize abanye abantu. Ngiyacela abantu bengivotele ngokulandela ikhasi lami leFacebook elinguKwenza Mncwango – Zee World Miss Teen Commonwealth SA 2016 Finalist,” kuzicelela uKwenza.